സാമന്തയുടെ 'ഊ അണ്ടാവാ'യെ വെല്ലുമോ ശ്രീലീലയുടെ 'കിസിക്', നാളെ വൈകിട്ട് ഏഴു മണിക്ക് അറിയാം. പുഷ്പ് 2 ദി റൂളില്‍ ഐറ്റം നമ്പരുമായി ശ്രീലീല എത്തും എന്ന വിവരം പുറത്തുവന്നതോടെ സാമന്തയോ ശ്രീലീലയോ എന്ന തര്‍ക്കം ഇരുവരുടേയും ആരാധകര്‍ തുടങ്ങിയിരുന്നു. ഇപ്പോഴിതാ ഗാനത്തിന്‍റെ പ്രൊമോ വിഡിയോ പുറത്തുവന്നിരിക്കുകയാണ്. ദേവി ശ്രീ പ്രസാദ് സംഗീതം നല്‍കുന്ന പാട്ടിന്‍റെ 17 സെക്കന്‍റ് മാത്രം നീളുന്ന പ്രൊമോ തന്നെ വലിയ ഓളമാണ് ഉണ്ടാക്കുന്നത്.
ലോതിക, സുഭലഷിണി എന്നിവര്‍ ചേര്‍ന്നാണ് ഗാനം പാടുന്നത്. ശ്രീലീലക്കൊപ്പം അല്ലുവും ഗാനരംഗത്തിലുണ്ടാവും. ഗാനത്തിന്‍റെ ചിത്രീകരണത്തിനിടെ പുറത്തുവന്ന ചിത്രങ്ങളൊക്കെ സോഷ്യല്‍ മീഡിയയില്‍ തരംഗമായിരുന്നു. സുകുമാര്‍ സംവിധാനം ചെയ്യുന്ന ചിത്രം ഡിസംബര്‍ അഞ്ചിനാണ് റിലീസ് ചെയ്യുന്നത്. റിലീസിന് മുന്നോടിയായി നവംബർ 27ന് അല്ലു കൊച്ചിയിലും എത്തുന്നുണ്ട്.
പുഷ്പ 2 ദി റൂളിന്‍റെ ട്രെയിലറിന് വന്‍വരവേല്‍പ്പാണ് ലഭിച്ചത്. ആദ്യഭാഗത്തെക്കാള്‍ ഗ്രാന്‍ഡായിരിക്കും രണ്ടാം ഭാഗമെന്ന സൂചന നല്‍കുന്ന ഗംഭീര ട്രെയിലറാണ് പുറത്തുവിട്ടത്. രശ്മിക മന്ദാനയാണ് ചിത്രത്തില്‍ നായികയാവുന്നത്. ഫഹദ് ഫാസിന്‍റെ വില്ലനായ ബന്‍വര്‍ സിംഘ് ഷെഖാവത്തിനേയും പ്രേക്ഷകര്‍ അക്ഷമയോടെയാണ് കാത്തിരിക്കുന്നത്.