മമ്മൂട്ടി ചിത്രം 'വല്ല്യേട്ടന്‍' തിയറ്ററില്‍ റീ റിലീസ് ചെയ്തതിന്‍റെ ആഘോഷത്തിലാണ് ആരാധകര്‍. ഇപ്പോഴിതാ ചിത്രത്തിലെ വിശേഷങ്ങള്‍ പങ്കുവച്ചിരിക്കുകയാണ് നടന്‍ മനോജ് കെ ജയന്‍. 'വല്ല്യേട്ടൻ' സിനിമയുടെ സമയത്തും ഈയടുത്ത കാലത്തും മമ്മൂട്ടിക്കൊപ്പം എടുത്ത ചിത്രങ്ങൾ സഹിതമാണ് മനോജ് കെ.ജയന്റെ പോസ്റ്റ്. 24 വർഷം ചലഞ്ച് എന്ന അടിക്കുറിപ്പിനൊപ്പമായിരുന്നു താരം ചിത്രങ്ങൾ പങ്കുവച്ചത്.
രണ്ടുപേർക്കും കാര്യമായ മാറ്റങ്ങളൊന്നുമില്ലെന്നാണ് ആരാധകരുടെ കമന്റ്. ചിത്രത്തില്‍ മമ്മൂട്ടിയുടെ അറയ്ക്കൽ മാധവനുണ്ണി ദത്തെടുക്കുന്ന സഹോദര കഥാപാത്രമായ ദാസനെയാണ് ചിത്രത്തിൽ മനോജ് കെ.ജയൻ അവതരിപ്പിച്ചത്.
രഞ്ജിത്തിന്റെ തിരക്കഥയിൽ ഷാജി കൈലാസ് ഒരുക്കിയ ചിത്രം അമ്പലക്കര ഫിലിംസിന്റെ ബാനറിൽ ബൈജു അമ്പലക്കരയാണ് റീ-റിലീസിനായി ഒരുക്കുന്നത്. മാറ്റിനി നൗവാണ് ഫോർ കെ ദൃശ്യമികവോടെയും ഡോൾബി അറ്റ്മോസ് ശബ്ദ സാങ്കേതികവിദ്യയോടെയും ഈ ചിത്രം വീണ്ടും തിയറ്ററുകളിലേക്ക് എത്തിച്ചത്.