ദുല്‍ഖറുമൊത്ത് വമ്പന്‍ പ്രോജക്ടോ? സൂചന നല്‍കി സൗബിന്‍
- Entertainment
- Published on Nov 30, 2024, 04:01 PM IST
ആരാധകര്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ദുല്‍ഖര്‍ സല്‍മാന്‍–സൗബിന്‍ ഷാഹിര്‍ പ്രോജക്ട്. സൗബിന്‍റെ സംവിധാനത്തില്‍ ദുല്‍ഖര്‍ എത്തിയ പറവ ഇന്നും ആരാധകര്‍ മറന്നിട്ടില്ല. അത്രയും ഓളം ഇമ്രാന്‍ എന്ന ദുല്‍ഖര്‍ കഥാപാത്രം സൃഷ്ടിച്ചിരുന്നു. ഇതിനു ശേഷം ഇരുവരും ചേര്‍ന്ന് 'ഓതിരം കടകം' എന്ന ചിത്രം പ്രഖ്യാപിച്ചിരുന്നുവെങ്കിലും കാര്യമായ അപ്ഡേഷന്‍ ഒന്നും ഉണ്ടായിരുന്നില്ല.
ഇപ്പോഴിതാ പ്രതീക്ഷകള്‍ക്ക് വീണ്ടും ജീവന്‍ നല്‍കി സൗബിന്‍റെ ഇന്‍സ്റ്റഗ്രാം സ്റ്റോറി ശ്രദ്ധ ആകര്‍ഷിക്കുകയാണ്. ഒരു റേസിങ് ബൈക്കിന്‍റെ മുകളില്‍ ദുല്‍ഖര്‍ സല്‍മാന്‍റേയും സമീര്‍ താഹിറിന്‍റേയും പേര് എഴുതിയ ചിത്രമാണ് സൗബിന്‍ സ്റ്റോറിയായി പങ്കുവച്ചിരിക്കുന്നത്. വ്യത്യസ്തമായ ഴോണറിൽ ബീച്ച് റേസ്, ന്യൂ ഇയർ ക്രിസ്തുമസ് ഒകെയ് വരുന്ന വിഷ്വലി വലുപ്പം കാണിക്കുന്ന ഒരു ചിത്രം ആലോചനയിൽ ഉണ്ടെന്ന് മുമ്പ് ഒരു അഭിമുഖത്തില്‍ സൗബിൻ പറഞ്ഞിരുന്നു. ഇന്‍സ്റ്റ സ്റ്റോറിക്ക് പിന്നാലെ ഈ അഭിമുഖ ഭാഗവും വൈറാവുകയാണ്. പറവക്ക് ശേഷം ഇരുവരും വീണ്ടും ഒന്നിക്കുന്ന ചിത്രം ഉടന്‍ തന്നെ കാണാനാകുമെന്നാണ് ഇപ്പോള്‍ സോഷ്യല്‍ മീഡിയ ചര്‍ച്ച.
മലയാളത്തിൽ രണ്ട് സിനിമകൾ ഉടൻ ചെയ്യുമെന്ന് അടുത്തിടെ ലക്കി ഭാസ്കർ സിനിമയുടെ കൊച്ചി പ്രീ റിലീസ് ഇവന്റിൽ ദുൽഖർ സൽമാൻ പറഞ്ഞിരുന്നു. ‘ആർഡിഎക്സ്’ സംവിധായകൻ നഹാസ് ഹിദായത്തും സൗബിൻ ഷാഹിറും ഒരുക്കുന്ന സിനിമകളിലാകും നായകനായി ദുൽഖർ എത്തുക.
