തിയേറ്ററുകളില്‍ കാട്ടുതീയാവുകയാണ് പുഷ്പ 2 ദി റൂള്‍. 2021ല്‍ റിലീസ് ചെയ്ത പുഷ്പ ദി റൈസിന്‍റെ തുടര്‍ച്ചയായെത്തിയ ചിത്രം ഒന്നാം ഭാഗത്തേതിനേക്കാള്‍ ഇരട്ടിയിലധികം ബജറ്റിലാണ് നിര്‍മിച്ചിരിക്കുന്നത്. റിലീസ് ചെയ്ത് ഒരു മാസം തികയുന്നതിനുമുമ്പ് തന്നെ ചിത്രത്തിന്‍റെ ഒടിടി റിലീസ് സംബന്ധിച്ച് പല ഊഹോപോഹങ്ങളും പ്രചരിക്കുന്നുണ്ട്. ഇതിനിടെ ചിത്രത്തിന്‍റെ ഒടിടി റിലീസില്‍ വ്യക്തത വരുത്തിയിരിക്കുകയാണ് നിര്‍മാണ കമ്പനിയായ മൈത്രി മൂവി മേക്കേഴ്സ്. 56 ദിവസം കഴിയാതെ ചിത്രം ഒരു ഒടിടി പ്ലാറ്റ്ഫോമിലും എത്തില്ല എന്ന് എക്സില്‍ പങ്കുവച്ച പോസ്റ്റില്‍ അവര്‍ കുറിച്ചു.
മൈത്രി മൂവി മേക്കേഴ്സിന്‍റെഎക്സ് കുറിപ്പ് ഇങ്ങിനെ, 'പുഷ്പ 2 ദി റൂളിന്‍റെ ഒടിടി റിലീസിനെ പറ്റിയുള്ള ഊഹോപോഹങ്ങള്‍ പരക്കുന്നുണ്ട്. ഈ അവധിക്കാല സീസണില്‍ പുഷ്പ ബിഗ് സ്ക്രീനില്‍ തന്നെ ആസ്വദിക്കൂ. 56 ദിവസത്തിനുള്ളില്‍ സിനിമ ഒടിടിയില്‍ എത്തില്ല. ഇത് കാട്ടൂതീയായ പുഷ്പ, ലോകമെമ്പാടുമുള്ള തിയേറ്ററുകളില്‍ മാത്രം,'
കഴിഞ്ഞ ഡിസംബര്‍ അഞ്ചിനാണ് പുഷ്പ 2 ദി റൂള്‍ റിലീസ് ചെയ്തത്. തെലുങ്കിന് പുറമേ ഹിന്ദി, തമിഴ്, കന്നഡ, മലയാളം ബെംഗാളി എന്നീ ഭാഷകളിലേക്കും ചിത്രം മൊഴിമാറ്റം ചെയ്ത് റിലീസ് ചെയ്തിരുന്നു. 1000 കോടിയിലധികം നേടിയ പുഷ്പ 2 ഇതിനോടകം തന്നെ ആര്‍ആര്‍ആര്‍, കെജിഎഫ് 2, കല്‍ക്കി 2898 എഡി, ജവാന്‍, പഠാന്‍ എന്നീ ചിത്രങ്ങളെ കളക്ഷനില്‍ പിന്നിലാക്കിയിരുന്നു. സുകുമാര്‍ സംവിധാനം ചെയ്ത ചിത്രത്തില്‍ രശ്മിക മന്ദാനയാണ് നായിക. ഫഹദ് ഫാസിലും ഒരു പ്രധാന വേഷത്തിലെത്തിയിരുന്നു.