കൊല്ലം കരുനാഗപ്പള്ളിയിൽ ഓംലെറ്റ് വൈകിയതിനെച്ചൊല്ലിയുണ്ടായ തർക്കത്തിൽ ദോശക്കട തല്ലിത്തകർത്ത രണ്ടുപേരെ പൊലീസ് അറസ്റ്റു ചെയ്തു. പ്രതികളുടെ ആക്രമണത്തില്‍ ഭക്ഷണം കഴിക്കാനെത്തിയ രണ്ടുപേര്‍ക്ക് പരുക്കേറ്റിരുന്നു.
കരുനാഗപ്പളളി പടവടക്ക് സ്വദേശി ബ്രിട്ടോ എന്ന മുഹമ്മദ് സലീം, പ്രഭാത് എന്നിവരാണ് പിടിയിലായത്. കഴിഞ്ഞ പതിനഞ്ചിന് രാത്രിയാണ് കരുനാഗപ്പള്ളി ആലുംമൂട്ടിലെ ദോശകടയിൽ പ്രതികള്‍ ആക്രമണം നടത്തിയത്. തൊടിയൂർ സ്വദേശികളായ സഹോദരങ്ങൾ ഓംലെറ്റ് ഓര്‍‍ഡര്‍ ചെയ്തപ്പോള്‍ ഓംലെറ്റ് അല്‍പം വൈകുമെന്ന് കടയുടമ സൗഹൃദത്തോടെ പറഞ്ഞു. എന്നാല്‍ ഓംലെറ്റ് ഓര്‍‍ഡര്‍ ചെയ്ത യുവാക്കളുമായി യാതൊരു ബന്ധവുമില്ലാത്ത പ്രതികള്‍ ഇതിനെച്ചൊല്ലി കടയുടമയുമായി തര്‍ക്കം ഉണ്ടാക്കി കട അടിച്ചുതകര്‍ക്കുകയായിരുന്നു. ഓംലെറ്റ് ഓര്‍‍ഡര്‍ ചെയ്ത യുവാക്കള്‍ക്കും മര്‍ദനമേറ്റു. മദ്യലഹരിയിൽ ഇരുമ്പു വടിയും കോൺക്രീറ്റ് കട്ടയും കൊണ്ടായിരുന്നു പ്രതികളുടെ ആക്രമണം.
പിടിയിലായ പ്രതികൾ ക്രിമിനൽ കേസുകളിൽ പ്രതികളാണെന്ന് പൊലീസ് അറിയിച്ചു