ഹാര്‍ഡ് ഡിസ്ക്ക് ഉള്‍പ്പെടെ കവര്‍ന്ന് കള്ളന്‍; തൃത്താല ബവ്റിജസ് വില്‍പ്പന കേന്ദ്രത്തില്‍ കവർച്ച

തൃത്താല ബവ്റിജസ് വില്‍പ്പന കേന്ദ്രത്തില്‍ കവർച്ച. വാതിലിന്റെ പൂട്ട് പൊളിച്ച് മാറ്റിയാണ് കവര്‍ച്ച നടത്തിയത്. സി.സി.ടി.വി ദൃശ്യങ്ങള്‍ ഉള്‍പ്പെടുന്ന ഹാര്‍ഡ് ഡിസ്ക്ക് ഉള്‍പ്പെടെ കള്ളന്‍ കവര്‍ന്നു. 

ബവ്റിജസ് കോർപ്പറേഷന്റെ ഞാങ്ങാട്ടിരി വി.കെ കടവ് റോഡിലുള്ള ഔട്ട്‌ലെറ്റിലാണ് കവര്‍ച്ചയുണ്ടായത്. രാത്രിയില്‍ കവര്‍ച്ച നടന്നതായാണ് നിഗമനം. കെട്ടിടത്തിന്‍റെ പിന്‍വശത്തെ വാതിലിന്റെ പൂട്ട് കട്ടർ ഉപയോഗിച്ച് മുറിച്ചുമാറ്റിയാണ് കള്ളന്‍ അകത്ത് കടന്നത്. സ്ഥാപനത്തിലെ സി.സി.ടി.വിയുടെ ഡി വി ആറും നഷ്ടമായിട്ടുണ്ട്. 

സമീപത്തെ സിമന്റ് ഗോഡൗണിലെ ആളുകൾ രാവിലെ എത്തിയപ്പോഴാണ് വാതിൽ തുറന്ന് കിടക്കുന്ന നിലയിൽ കണ്ടത്. ഉടൻ ബവ്്റിജസ് ഔട്ട്ലെറ്റ് ഉദ്യോഗസ്ഥരെ വിവരമറിയിക്കുകയായിരുന്നു. ഉദ്യോഗസ്ഥരും ജീവനക്കാരും എത്തുകയും തൃത്താല പൊലീസില്‍ വിവരമറിയിക്കുകയും ചെയ്തു. ഷൊർണൂർ ഡിവൈഎസ്പി ആർ. മനോജിന്റെ നേതൃത്വത്തില്‍ പൊലീസെത്തി വിശദമായി പരിശോധിച്ചു. ഡോഗ് സ്ക്വാഡും വിരലടയാള വിദ്ഗധരും സ്ഥലത്തെത്തി തെളിവ് ശേഖരിച്ചു.