ട്രാക്ടർ ഡ്രൈവർ എന്ന വ്യാജേന ഒഡീഷയിൽ; പിടിയിലായത് ലഹരി സംഘത്തിന്റെ തലവൻ

കൊച്ചി പള്ളുരുത്തിയിൽ കാറിൽ കഞ്ചാവൊളിപ്പിച്ച് കടത്തിയ ലഹരി സംഘത്തിന്റെ തലവൻ പിടിയിൽ. തൃപ്പൂണിത്തുറ സ്വദേശി അഖിൽ സന്തോഷിനെ ഒന്നരവർഷങ്ങൾക്ക് ശേഷം ഒഡീഷയിൽ നിന്നാണ് പിടികൂടിയത്. ലഹരിമാഫിയ സംഘത്തിന്റെ സഹായത്തോടെ ട്രാക്ടർ ഡ്രൈവർ എന്ന വ്യാജേനയാണ് അഖിൽ കഴിഞ്ഞിരുന്നത്.

കഴിഞ്ഞ വർഷം മാർച്ചിൽ ഒഡീഷയിൽ നിന്ന് ലോറിയിലാണ് പള്ളുരുത്തിയിൽ പിടികൂടിയ കഞ്ചാവ് എത്തിച്ചത്. കായംകുളത്തെ ലഹരി മാഫിയ സംഘത്തിന് കൈമാറിയ കഞ്ചാവാണ് കാറിൽ പള്ളുരുത്തിയിൽ ഒളിപ്പിച്ചത്. കേസിൽ രണ്ട് യുവതികളടക്കം 15 പേരെ നേരത്തെ അറസ്റ്റ് ചെയ്തിരുന്നു. കേസിൽ കൂടുതൽ അറസ്റ്റുണ്ടാകുമെന്ന് മട്ടാഞ്ചേരി എ.സി.പി പി.ബി.കിരൺ വ്യക്തമാക്കി.