തമിഴകത്ത് ഫാൻസ് അസോസിയേഷനൊന്നുമില്ലെങ്കിലും രജനികാന്തിനൊപ്പം തന്നെ ആരാധകരുള്ള താരമാണ് തല അജിത്ത്. താരത്തിന്റെ നിലപാടുകൾക്കും അഭിപ്രായങ്ങൾക്കും എളിമയ്ക്കും എപ്പോഴും ഒപ്പം നിൽക്കാറുണ്ട് ആരാധകർ. ഇപ്പോഴിതാ ഏറെ പഴയ ഒരു ചിത്രം സോഷ്യൽ ലോകത്ത് വീണ്ടും വൈറലാക്കിയിരിക്കുകയാണ് തല ആരാധകർ.
രജനികാന്ത് ചിത്രത്തിനൊപ്പം തിയറ്ററിലെത്തിയിട്ടും ബോക്സോഫീസിൽ അമ്പരപ്പിക്കുന്ന മൽസരമാണ് അജിത്ത് ചിത്രം വിശ്വാസം നടത്തിയത്. കളക്ഷനിലും റെക്കോർഡുകൾ തിരുത്തിയിരുന്നു ചിത്രം. ഇതോടെ പോയ പരാജയങ്ങളെയെല്ലാം അജിത്ത് തിരുത്തിക്കുറിച്ച് വൻമുന്നേറ്റമാണ് നടത്തിയിരിക്കുന്നത്. ഇതിന്റെ ചുവട് പിടിച്ചാണ് താരത്തിന്റെ പഴയ ചിത്രം പങ്കുവച്ച് ആരാധകർ ചിലത് ഓർമിപ്പിക്കുന്നത്.
നടൻ പ്രശാന്തിന്റെയും അജിത്തിന്റെയും പഴയ ചിത്രമാണ് ഇപ്പോൾ വൈറലാകുന്നത്. പ്രശാന്തിനെ പൂമാലയിട്ട് സ്വീകരിക്കുമ്പോൾ തലകുനിച്ച് നിൽക്കുകയാണ് അജിത്ത്. അന്ന് അജിത്തിനെക്കാൾ വലിയ താരമായിരുന്നു പ്രശാന്ത്. നടൻ ത്യാഗരാജന്റെ മകൻ എന്ന മേൽലിലാസം കൂടി ആയപ്പോൾ പ്രശാന്ത് സിനിമയിൽ അക്കാലത്ത് മിന്നിത്തിളങ്ങി. എന്നാൽ പിന്നീട് നിരന്തരം പരാജയങ്ങളേറ്റ് വാങ്ങി പ്രശാന്തിന് താരസിംഹാസനം തന്നെ നഷ്ടമായി. അജിത്താകട്ടെ സൂപ്പർ താരവുമായി. ഇൗ താരതമ്യം വ്യക്തമാക്കി ആരാധകർ സോഷ്യൽ വാളുകളിൽ കുറിച്ച വാക്കുകളിലും ഇതു വ്യക്തം. ‘എങ്ങനെ തുടങ്ങി എന്നുള്ളതിലല്ല കാര്യം. എവിടെ എത്തി എന്നുള്ളതാണ്.’