ജീവിതത്തില്‍ ഭാര്യാഭര്‍ത്താക്കന്മാരായവര്‍ സിനിമയില്‍ നായികാനായകന്മാരായി ഒരുമിച്ച് അഭിനയിക്കുന്നത് അപൂര്‍വമാണ്. നടന്‍ ശ്രീജിത്ത് രവിയും ഭാര്യ സജിത ശ്രീജിത്തുമാണ് സിനിമയിലും ഭാര്യാഭര്‍ത്താക്കന്മാരായി വേഷമിടുന്നത്. നവാഗതനായ എം.ശ്രീജിത്ത് സംവിധാനം ചെയ്യുന്ന കോട എന്ന ചിത്രത്തിലാണ് ഇരുവരും പ്രധാന വേഷങ്ങളിലെത്തുന്നത്.
പുതിയതായി വാങ്ങിയ വേനല്‍ക്കാല വസതിയിലേക്കുള്ള ഒരു കുടുംബത്തിന്റെ യാത്രയും അവിടെയുണ്ടാകുന്ന ദുരൂഹമായ സംഭവിവകാസങ്ങളുമാണ് കോട എന്ന സിനിമയില്‍ ചിത്രീകരിച്ചിരുന്നത്. നേവല്‍ ഓഫിസറായി ശ്രീജിത്ത് രവിയും ഭാര്യയായി സജിത ശ്രീജിത്തും ചിത്രത്തിലെ പ്രധാന വേഷങ്ങളിലെത്തുന്നു. വീഡിയോ ആല്‍ബങ്ങളിലും ആഡ്ഫിലിംസിലും അഭിനയിച്ചിട്ടുള്ള സജിത ശ്രീജിത്തിന്റെ ആദ്യ സിനിമയാണ് ഇത്.
ഡ്രീം സിനിമാസിന്റെ ബാനറിലാണ് ചിത്രം നിര്‍മിച്ചിരിക്കുന്നത്. മാര്‍ട്ടിന്‍ മിസ്റ്റ് ക്യാമറയും, പ്രസാദ് നാരായണന്‍ എഡിറ്റിങ്ങും നിര്‍വഹിച്ചിരിക്കുന്ന ചിത്രത്തിന് സംഗീതം ഒരുക്കിയിരിക്കുന്നത് സാമുവല്‍ എബിയാണ്. തമിഴ്നാട്ടിലെ പ്രശസ്ത സിനിമാറ്റോഗ്രഫറായ എസ്. കമല്‍ കണ്ണനാണ് ക്രിയേറ്റീവ് ഹെഡ്. ഒടിടി പ്ലാറ്റ്ഫോം വഴി ചിത്രം പ്രേക്ഷകരിലെത്തും.