യേശുദാസിന്റെ ഓണപാട്ടിന് കൊച്ചി വിമാനത്താവളത്തിന്റെ ദൃശ്യവിരുന്ന്. പതിനെട്ട് വർഷത്തെ ഇടവേളക്ക് ശേഷം തരംഗിണിയുടെ ബാനറിൽ യേശുദാസ് പാടിയ ഓണപാട്ട് പൊൻ ചിങ്ങത്തേര് സിയാലിന്റെയും കൊച്ചിൻ ഡ്യൂട്ടിഫ്രീയുടെയും ദൃശ്യങ്ങളുടെ അകമ്പടിയോടെ പുറത്തിറക്കി. കൊച്ചി വിമാനത്താവളത്തിൽ ബുധനാഴ്ച നടന്ന ചടങ്ങിൽ നടൻ മോഹൻലാൽ യേശുദാസിന്റെ ഓണപ്പാട്ടിന്റെ വീഡിയോ പ്രകാശനം നിർവഹിച്ചു.
നാളുകള്‍ക്ക് ശേഷം യേശുദാസിന്റെ ഒാണപ്പാട്ട് പ്രേക്ഷകരിലേക്ക് എത്തുകയാണ്. അമേരിക്കയിൽ നിന്ന് യേശുദാസും ഭാര്യ പ്രഭയും ഓൺലൈൻ ആയി പങ്കെടുത്ത ചടങ്ങിലാണ് നടൻ മോഹൻലാൽ പാട്ടിന്റെ പ്രകാശനം നിര്‍വഹിച്ചത്. സിയാൽ മാനേജിങ് ഡയറക്ടർ എസ്.സുഹാസ് അധ്യക്ഷനായിരുന്നു. യേശുദാസ് പാടിയ പാട്ടുകള്‍ക്കായി അഭിനയിക്കാനുള്ള സൗഭാഗ്യത്തില്‍ അഭിമാനം ഉണ്ടെന്ന് മോഹൻലാൽ പറഞ്ഞു.
കൊച്ചി വിമാനത്താവളത്തിലാണ് ഇതിന്റെ വീഡിയോ ചിത്രികരണം നടന്നത്. ഹരിഹരൻ പുതുവാതുണ്ടിൽ രചിച്ച് നന്ദുകർത്ത ഈണമിട്ട പൊൻ ചിങ്ങത്തേര് എന്ന ഒരേയൊരു ഓണപാട്ടാണ് ഇക്കുറി യേശുദാസിന്റേതായി പുറത്തുവന്നത്. രമേശ്‌ പിഷാരടി , മനോജ് കെ.ജയൻ, ഗായകരായ സുജാത മോഹൻ , വിജയ് യേശുദാസ് തുടങ്ങി ഒട്ടേറെപേര്‍ ചടങ്ങില്‍ പങ്കെടുത്തു.