പാട്ട് പാടി കോളജ് പിള്ളേരെ കയ്യിലെടുത്ത് ചീനാട്രോഫിയിലെ നായിക; വീഡിയോ വൈറൽ

ധ്യാൻ ശ്രീനിവാസൻ ചിത്രം ചീനാട്രോഫി തീയറ്ററുകളിൽ വിജയകരമായി പ്രദർശനം തുടരുകയാണ്. അനിൽ ലാൽ സംവിധാനം നിർവഹിച്ച ചിത്രം കുട്ടനാട്ടിലെ ഒരു ഗ്രാമത്തിലേക്ക് ഒരു യുവാവിനെ തേടി ചൈനയിൽ നിന്നും ഒരു യുവതി വരുന്നതും പിന്നീട് ഉണ്ടാകുന്ന സംഭവവികാസങ്ങളുമാണ് പ്രേക്ഷകർക്ക് മുന്നിലേക്ക് അവതരിപ്പിച്ചിരിക്കുന്നത്.

സുരാജ് വെഞ്ഞാറമൂട് ചിത്രം ആൻഡ്രോയ്‌ഡ് കുഞ്ഞപ്പനിലൂടെ മലയാളി സുപരിചിതയായ കെന്റി സിർദോയാണ് ചിത്രത്തിലെ നായികയെ അവതരിപ്പിച്ചിരിക്കുന്നത്. ഒരു ടിബറ്റൻ പെൺകുട്ടിയായിട്ടാണ് താരം ചിത്രത്തിൽ അഭിനയിച്ചിരിക്കുന്നത്. ഇപ്പോഴിതാ തൃശ്ശൂർ സെന്റ് മേരീസ് കോളേജിൽ നടന്ന ചടങ്ങിൽ ആൻഡ്രോയിഡ് കുഞ്ഞപ്പനിലെ പുലരാൻ നേരം എന്ന ഗാനം ആലപിച്ച് കെന്റി സിർദോ വൈറലായിരിക്കുകയാണ്.

ധ്യാനും കെന്റി സിര്‍ദോയും ഒന്നിക്കുന്ന ചിത്രം പ്രസിഡന്‍ഷ്യല്‍ മൂവീസ് പ്രൈവറ്റ് ലിമിറ്റഡിന്റെ ബാനറില്‍ അനൂപ് മോഹൻ, ആഷ്ലിൻ മേരി ജോയ്, ലിജോ ഉലഹന്നാൻ എന്നിവര്‍ ചേര്‍ന്നാണ് നിര്‍മ്മിച്ചിരിക്കുന്നത്. ജാഫര്‍ ഇടുക്കി, സുധീഷ്, കെപിഎസി ലീല, ദേവിക രമേഷ്, പൊന്നമ്മ ബാബു, സുനില്‍ ബാബു, ജോണി ആന്റണി, ജോര്‍ഡി പൂഞ്ഞാര്‍, നാരായണന്‍ കുട്ടി, വരദ, ബിട്ടു തോമസ് തുടങ്ങിയ താരങ്ങളും ചിത്രത്തില്‍ അണിനിരക്കുന്നുണ്ട്.