മലയാള സിനിമയുടെ സീന്‍ മാറ്റിയ ചിത്രമാണ് മഞ്ഞുമ്മല്‍ ബോയ്സ്. കേരളത്തിന് പുറത്തേക്കും വലിയ സ്വീകാര്യതയാണ് ലഭിച്ചത്. യഥാര്‍ത്ഥ സംഭവത്തെ ആസ്പദമാക്കി നിര്‍മിച്ച ചിത്രം സൗഹൃദത്തിന്‍റെ തീവ്രതയെ കാണിച്ചുതന്നിരുന്നു. മികച്ച പ്രകടനത്തിനൊപ്പം തന്നെ ചിത്രത്തിന്‍റെ ആര്‍ട്ട് വര്‍ക്കും വിഎഫ്എക്സും പരക്കെ പ്രശംസിക്കപ്പെട്ടിരുന്നു. ഒറിജിനല്‍ ഗുണ കേവിനോട് കിട പിടിക്കുന്നതായിരുന്നു ആര്‍ട്ട് ടീം ഒരുക്കിയ ആര്‍ട്ടിഫിഷ്യല്‍ ഗുണ കേവും.
ചിത്രത്തിന്‍റെ വിഎഫ്എക്സ് ബ്രേക്ക്ഡൗണ്‍ വിഡിയോ പുറത്ത് വിട്ടിരിക്കുകയാണ് ഇപ്പോള്‍. സുഭാഷിനെ രക്ഷിക്കുന്ന സീനുകളും സെറ്റിട്ട ഗുണാകേവും മാത്രമല്ല വഴിയോരത്തെ മലകളും തടിയും കൂണുകളും മഴവെള്ളവും വരെ വിഎഫ്എക്സ് ചെയ്തിട്ടുണ്ട്. എഗ്വൈറ്റ് ടീമാണ് ചിത്രത്തിന്‍റെ വിഎഫ്എക്സ് ചെയ്തിരിക്കുന്നത്. തൗഫീക് ഹുസൈൻ ആണ് വിഎഫ്എക്സ് സൂപ്പർവൈസർ. വിഡിയോ പുറത്ത് വിട്ടതോടെ ഇതൊക്കെ ഗ്രാഫിക്സ് ആയിരുന്നോ എന്നാണ് പ്രേക്ഷകര്‍ ചോദിക്കുന്നത്.
ചിദംബംരം സംവിധാനം ചെയ്ത ചിത്രത്തില്‍ സൗബിന്‍ ഷാഹിര്‍, ഗണപതി, ചന്തു, ഖാലിദ് റഹ്മാന്‍, ജീന്‍ പോള്‍ ലാല്‍, ബാലു വര്‍ഗീസ് തുടങ്ങി നിരവധി താരങ്ങളാണ് അഭിനയിച്ചത്. ചിത്രം ബോക്സ് ഓഫീസിലും വെന്നിക്കൊടി പാറിച്ചു. തീയറ്ററിൽ 73 ദിവസം ഓടിയ ചിത്രം 242 കോടിയാണ് കലക്ട് ചെയ്തത്.