‘എനിക്ക് കൊമ്പില്ല, ഞാന്‍ മദ്യപിച്ചിരുന്നില്ല, കാറിന്‍റെ ടയര്‍ പൊട്ടിയാണ് അപകടം’; മാപ്പു പറഞ്ഞ് ബൈജു

മദ്യലഹരിയിൽ അമിത വേഗത്തിൽ കാറോടിച്ച് വാഹനാപകടമുണ്ടാക്കിയ സംഭവത്തില്‍ ക്ഷമ ചോദിച്ച് സിനിമ നടന്‍ ബൈജു. സോഷ്യല്‍ മീഡിയയില്‍ വീഡിയോ സന്ദേശത്തിലൂടെയാണ് ബൈജു പൊതുസമൂഹത്തിനോട് ക്ഷമ ചോദിച്ചത്. ദൃശ്യങ്ങള്‍ പകര്‍ത്താന്‍ ശ്രമിച്ച മാധ്യമ പ്രവര്‍ത്തകരോട് ദേഷ്യപ്പെട്ടതിനും ബൈജു ഖേദം പ്രകടിപ്പിച്ചു. മാധ്യമ പ്രവര്‍ത്തകരാണെന്ന് അറിഞ്ഞില്ലെന്നും ടയര്‍ പഞ്ചറായതാണ് അപകടത്തിന് ഇടയാക്കിയതെന്നാണ് ബൈജു വിശദീകരിക്കുന്നത്. 

Read More : രക്തപരിശോധനയ്ക്കു തയ്യാറാകാതെ ബൈജു; കാറിലുണ്ടായിരുന്നത് മകളല്ല

‘മുന്നിലെ ടയര്‍ പൊട്ടിയാണ് അപകടം, ഞാന്‍ മദ്യപിച്ചിരുന്നില്ല, മദ്യപിച്ചെന്ന ആരോപണം സമൂഹമാധ്യമങ്ങള്‍ക്ക് റീച്ച് കൂട്ടാന്‍,എല്ലാ നിയമങ്ങളും അനുസരിക്കാന്‍ ഞാന്‍ ബാധ്യസ്ഥനാണ്, എന്‍റെ കൂടെയുണ്ടായിരുന്നത് വലിയമ്മയുടെ മകളുടെ മകളാണ് ’

ഞായറാഴ്ച അര്‍ധരാത്രിയാണ് തിരുവനന്തപുരം വെള്ളയമ്പലം ജംഗ്ഷനില്‍ വെച്ച് ബൈജുവിന്‍റെ വാഹനം സ്കൂട്ടർ യാത്രക്കാരനെ ഇടിച്ചത്. പിന്നാലെ ആശുപത്രിയിലേക്ക് കൊണ്ട് പോയെങ്കിലും ബൈജു വൈദ്യപരിശോധനയ്ക്ക് രക്ത സാമ്പിൾ കൊടുക്കാൻ തയ്യാറായില്ല. തുടർന്ന് മദ്യത്തിന്‍റെ ഗന്ധമുണ്ടെന്നും പരിശോധനക്ക് തയ്യാറായില്ലെന്നും ഡോക്ടർ പൊലീസിന് മെഡിക്കൽ റിപ്പോർട്ട് എഴുതി നല്‍കുകയായിരുന്നു. മദ്യപിച്ച് അമിത വേഗതയിൽ കാറോടിച്ചതിന് മ്യൂസിയം പൊലീസ് ബൈജുവിനെതിരെ കേസെടുത്തിട്ടുണ്ട്.