സലാര്‍ പോസ്റ്റര്‍ പങ്കുവച്ച് ഡോണ്‍ ലീ; രണ്ടാം ഭാഗത്തിലുണ്ടോ എന്ന് ആരാധകര്‍
- Entertainment
- Published on Nov 09, 2024, 10:30 PM IST
ഡോണ്‍ ലീയെ അറിയാത്ത സിനിമാ സ്നേഹികള്‍ ഉണ്ടാവില്ല. കൊറിയന്‍ ലാലേട്ടന്‍ എന്ന് മലയാളി ആരാധകര്‍ സ്നേഹത്തോടെ വിളിക്കുന്ന ഡോണ്‍ ലീയുടെ ആക്ഷന്‍ സിനിമകള്‍ ലോക പ്രശസ്തമാണ്.
ഇപ്പോഴിതാ താരത്തിന്‍റെ ഇന്‍സ്റ്റഗ്രാം സ്റ്റോറി കണ്ട് ത്രില്ലടിച്ചിരിക്കുകയാണ് സിനിമാ പ്രേമികള്‍. പ്രഭാസ് ചിത്രം സലാറിന്‍റെ പോസ്റ്ററാണ് താരത്തിന്‍റെ ഇന്‍സ്റ്റഗ്രാം സ്റ്റോറി. ഇതോടെ പലവിധ ഊഹാപോഹങ്ങളുമായി സോഷ്യല്‍ മീഡിയയില്‍ ആരാധകരും ഒത്തുകൂടി. താരം ചിത്രം കണ്ട് സ്റ്റോറി ചെയ്തതാണെന്നും അതല്ല രണ്ടാം ഭാഗത്തിലേക്ക് ഡോണ്‍ ലീയും വരുമെന്നുമൊക്കെയാണ് ആരാധകരുടെ ചര്‍ച്ചകള്‍.
സന്ദീപ് റെഡ്ഡി വംഗാ സംവിധാനം ചെയ്യാനിരിക്കുന്ന പ്രഭാസ് ചിത്രം സ്പിരിറ്റില്‍ ഡോണ്‍ ലീ വില്ലനായി എത്തിയേക്കും എന്ന റിപ്പോര്‍ട്ടുകള്‍ നേരത്തെ പുറത്തുവന്നിരുന്നു. ഈ ചര്‍ച്ചകള്‍ ചൂടുപിടിച്ചിരിക്കവേയാണ് പ്രഭാസ് ചിത്രത്തിന്‍റെ പോസ്റ്റര്‍ പങ്കുവച്ചിരിക്കുന്നത്. ഇതോടെ ഡോണ്‍ ലീ ഉടന്‍ ഇന്ത്യന്‍ സിനിമാ ലോകത്തേക്ക് എത്തുമെന്ന പ്രതീക്ഷയിലാണ് ആരാധകര്‍.
കല്‍ക്കിയാണ് ഒടുവില്‍ റിലീസ് ചെയ്ത പ്രഭാസ് ചിത്രം. നാഗ് അശ്വിന്‍ സംവിധാനം ചെയ്ത ചിത്രത്തില്‍ അമിതാഭ് ബച്ചന്‍, കമല്‍ ഹാസന്‍, ദിഷ പഠാനി, ദീപിക പദുകോണ്‍, ശോഭന, ദുല്‍ഖര്‍ സല്‍മാന്‍, വിജയ് ദേവരകൊണ്ട എന്നിങ്ങനെ വലിയ താരനിര തന്നെ എത്തിയിരുന്നു.
