പുഷ്​പരാജിന്‍റെ സാമ്രാജ്യം; വെറുതെയല്ല ബിഹാറില്‍ ട്രെയിലര്‍ ലോഞ്ച് വച്ചത്; ജനസാഗരം

ലോകമെങ്ങുമുള്ള അല്ലുഅര്‍ജുന്‍ ആരാധകര്‍ പ്രതീക്ഷയോടെ കാത്തിരുന്ന പുഷ്പ 2 വിന്റെ ട്രെയിലര്‍ ഇന്ന് വൈകിട്ട് ആറുമണിക്ക് നടക്കും. ബിഹാറിലെ പാറ്റ്നയിലാണ് ഗംഭീരചടങ്ങ് സംഘടിപ്പിച്ച് ട്രെയിലര്‍ ലോഞ്ച് നടക്കുന്നത്. ചിത്രത്തിന്റെ ഫുള്‍ ടീം പാറ്റ്നയിലെത്തിക്കഴിഞ്ഞു. ഈ ട്രെയിലര്‍ ലോഞ്ച് തന്നെ വലിയ ചരിത്രമാക്കാനുള്ള ഒരുക്കത്തിലാണ് അണിയറക്കാര്‍. 

സാധാരണഗതിയില്‍ ഡല്‍ഹി, മുംബൈ, ബാംഗളൂര്‍, ചെന്നൈ എന്നിവിടങ്ങളിലാണ് ലോഞ്ച് നടത്താറുള്ളത്, ഇതാദ്യമായാണ് ബിഹാറിലൊരു സിനിമട്രെയിലര്‍ ലോഞ്ച് നടക്കുന്നത്. എന്തുകൊണ്ട് പുഷ്​പ 2 പോലെ ഒരു വമ്പന്‍ ചിത്രത്തിന്‍റെ ട്രെയിലര്‍ ബിഹാറില്‍ വച്ചു എന്ന് പലരും നെറ്റി ചുളിച്ചിരുന്നു. എന്നാല്‍ അത്ഭുതപ്പെടേണ്ട കാര്യമില്ല, പാറ്റ്​നയില്‍ ട്രെയിലര്‍ ലോഞ്ച് വച്ചത് വെറുതെയല്ല എന്ന് തന്നെയാണ് ഒഴുകിയെത്തുന്ന ജനസാഗരം തെളിയിക്കുന്നത്. 

കേരളത്തില്‍ അല്ലു തരംഗമുണ്ടെങ്കിലും ഇന്ത്യയാകെ അല്ലു അര്‍ജുന് വലിയ റീച്ച് ലഭിക്കുന്നത് 2021ലെ പുഷ്പ സിനിമാ റിലീസിനു ശേഷമാണ്. ചിത്രത്തിന്‍റെ വിജയത്തോടെ അല്ലു പാന്‍ ഇന്ത്യന്‍ താരമായി. പാവങ്ങള്‍ക്കിടയില്‍ നിന്നും ഉയര്‍ന്നുവന്ന ചന്ദനക്കൊള്ളക്കാരുടെ രാജാവായ, തോള്‍ ചരിച്ചു നടക്കുന്ന പുഷ്​പക്ക് ബിഹീറില്‍ ആരാധകരേറെയാണ്. തങ്ങളുടെ ആരാധന പാത്രത്തെ കാണാനായി യുവാക്കള്‍ തിങ്ങിക്കൂടുകയാണ് പാറ്റ്​നയില്‍. ഗാന്ധി മൈതാനില്‍ ആഘോഷമായി ട്രെയിലര്‍ റിലീസിങ് ചടങ്ങും നടക്കും.

സുകുമാര്‍ സംവിധാനം ചെയ്യുന്ന പുഷ്​പയില്‍ രശ്​മിക മന്ദാനയാണ് നായികയായത്. ഫഹദ് ഫാസിലിന്‍റെ വില്ലന്‍ വേഷവും ആരാധകര്‍ ആവേശത്തോടെ കാത്തിരിക്കുന്ന പുഷ്​പയിലെ കഥാപാത്രമാണ്.