കുവൈത്തിൽ സ്വർണം, വാച്ചുകൾ തുടങ്ങിയ വിലപിടിപ്പുള്ള വസ്തുക്കളുടെ വ്യാപാരത്തിൽ പണമിടപാട് നിരോധിക്കാനുള്ള നടപടിയുമായി സർക്കാർ. സാമ്പത്തിക സുതാര്യത ഉറപ്പാക്കുക, കള്ളപ്പണം വെളുപ്പിക്കൽ തടയുക എന്നീ ലക്ഷ്യത്തോടെയാണ് നീക്കം. വാണിജ്യ വ്യവസായ മന്ത്രാലയത്തിന്‍റെ നിർദ്ദേശപ്രകാരമാണ് പുതിയ പരിഷ്കരണം.
സ്വർണം, വാച്ചുകൾ എന്നിവ വാങ്ങുന്നതിന് ഇനി ബാങ്ക് കാർഡ് അല്ലെങ്കിൽ ഇലക്ട്രോണിക് ഇടപാടുകൾ മാത്രമേ അനുവദിക്കൂ. പണമിടപാടുകൾക്ക് കുറഞ്ഞ പരിധി നിശ്ചയിക്കുന്നതും പരിഗണനയിലുണ്ട്. ഫിനാൻഷ്യൽ ആക്ഷൻ ടാസ്‌ക് ഫോഴ്‌സിന്‍റെ (എഫ്എടിഎഫ്) നിർദ്ദേശങ്ങളുടെ അടിസ്ഥാനത്തിലാണ് ഈ നീക്കം.
റിയൽ എസ്റ്റേറ്റ്, താല്‍ക്കാലിക വ്യാപാര മേളകള്‍,കാര്‍ ബ്രോക്കറേജ് (Auctions),പുതിയതും ഉപയോഗിച്ചതുമായ കാറുകളുടെ വില്പന, ആഭ്യന്തര തൊഴില്‍ ഓഫിസുകള്‍, ഫാര്‍മസികളില്‍ നിന്ന് പത്ത് ദിനാറിന് മുകളിലുള്ള പര്‍ച്ചേഴ്‌സ് തുടങ്ങിയവയാണ് പണമിടപാട് നിരോധനത്തിന് വിധേയമായ മറ്റ് മേഖലകൾ.