ജി 20 ഉച്ചകോടിക്കായി പ്രധാനമന്ത്രി നരേന്ദ്രമോദി ഇന്ന് ബ്രസീലില്‍. നീതിയുക്തമായ ലോകവും സുസ്ഥിര ഭൂമിയും എന്നതാണ് ബ്രസീല്‍ ഉച്ചകോടിയുടെ പ്രമേയം. ഡല്‍ഹി ഉച്ചകോടിയില്‍ തുടക്കമായ ഗ്ലോബല്‍ സൗത്ത് ശക്തിപ്പെടുത്തലിന്‍റെ തുടര്‍ച്ചയാണ് റിയോ ഡി ജെനീറോയില്‍ പ്രതീക്ഷിക്കുന്നത്. ബ്രസീല്‍ പ്രസിഡന്‍റ് ലുല ഡിസില്‍വയുമായി നരേന്ദ്രമോദി ചര്‍ച്ച നടത്തും.
നൈജീരിയ, ഗയാന റിപ്പബ്ലിക്കുകള്‍ സന്ദര്‍ശിച്ച ശേഷമാണ് നരേന്ദ്രമോദി റിയോയിലെത്തുന്നത്. ഡല്‍ഹി ഉച്ചകോടിയുടെ ആതിഥേയന്‍ എന്ന നിലയില്‍ ബ്രസീലില്‍ ട്രോയിക അംഗമാണ് ഇന്ത്യന്‍ പ്രധാനമന്ത്രി. വിശപ്പിനും ദാരിദ്ര്യത്തിനുമെതിരായ പോരാട്ടമാണ് രാഷ്ട്രത്തലവന്‍മാരുടെ പ്രധാന ചര്‍ച്ചാ വിഷയം. നൈജീരിയന്‍ പ്രസിഡന്‍റ് ബോല അഹമ്മദ് ടിനുബുവുമായുള്ള കൂടിക്കാഴ്ചയിലും മോദി ഗ്ലോബൽ സൗത്തിന്റെ വികസനത്തെക്കുറിച്ച് പരാമര്‍ശിച്ചു.
ഉച്ചകോടിയില്‍ ആഗോള പ്രാധാന്യമുള്ള വിഷയങ്ങളിൽ ഇന്ത്യയുടെ നിലപാടുകൾ മോദി വ്യക്തമാക്കും. ആഗോള ഭരണസ്ഥാപനങ്ങളില്‍ വരുത്തേണ്ട പരിഷ്ക്കാരങ്ങളും ചര്‍ച്ചയാകും. സുസ്ഥിര വികസനവും ഊര്‍ജപരിവര്‍ത്തനവുമാണ് ജി 20യിലെ മറ്റൊരു പ്രധാന വിഷയം. മൂന്ന് പ്ലീനറി സെഷനുകളാണുള്ളത്. ഉച്ചകോടിക്കെത്തുന്ന രാഷ്ട്ര നേതാക്കളുമായി മോദി ഉഭയകക്ഷി ചര്‍ച്ചകളും നടത്തും.