അവിവാഹിതരായ കപ്പിള്‍സിന് ഇനി ഓയോയില്‍ മുറി കിട്ടില്ല; ചെക്ക്-ഇൻ പോളിസിയില്‍ മാറ്റം
- India
- Published on Jan 05, 2025, 02:22 PM IST
ട്രാവൽ ബുക്കിങ് കമ്പനിയായ ഓയോ, കമ്പനിയുമായി സഹകരിക്കുന്ന ഹോട്ടലുകൾക്കായി പുതിയ ചെക്ക്-ഇൻ പോളിസി അവതരിപ്പിച്ചു. ഇതോടെ അവിവാഹിതരായവര്‍ക്ക് ഇനി ഓയോയില്‍ ഇനി ചെക്ക് ഇൻ ചെയ്യാൻ കഴിയില്ല. കമ്പനിയുടെ പുതിയ പോളിസി മീററ്റിലാണ് ആദ്യം നടപ്പിലാക്കുക. ഇത് മറ്റ് നഗരങ്ങളിലേക്കും ഉടന്‍ നടപ്പാക്കുമെന്ന് പിടിഐ റിപ്പോര്‍ട്ട് ചെയ്യുന്നു.
പുതുക്കിയ നയം അനുസരിച്ച്, ചെക്ക്-ഇൻ സമയത്ത് റൂം എടുക്കുന്നവര്‍ തമ്മിലുള്ള ബന്ധം തെളിയിക്കുന്ന രേഖകള്‍ ഹജരാക്കേണ്ടതുണ്ട്. ഓൺലൈനിൽ നടത്തിയ ബുക്കിങുകൾക്കും ഇത് നിര്‍ബന്ധമാണ്. പ്രാദേശിക സാമൂഹിക സാഹചര്യം അനുസരിച്ച് ഹോട്ടലുകള്‍ക്ക് കപ്പിള്‍ ബുക്കിങ് നിരസിക്കാനുള്ള വിവേചനാധികാരം ഉണ്ടായിരിക്കുമെന്നും പുതുക്കിയ നയം പറയുന്നു. മീററ്റിലുള്ള ഹോട്ടലുകള്‍ പുതുക്കിയ നയം ഉടനെ നടപ്പിക്കാന്‍ കമ്പനി നിര്‍ദ്ദേശം നല്‍കി. പ്രതികരണം അനുസരിച്ച് പോളിസി മറ്റു നഗരങ്ങളിലേക്ക് വ്യാപിപ്പിക്കുമെന്നാണ് വിവരം.
അവിവാഹിതരായ കപ്പിള്‍സിന് മുറി നല്‍കുന്നത് അവസാനിപ്പിക്കണമെന്ന് മീററ്റ് അടക്കമുള്ള നഗരങ്ങളില്‍ നിന്നും ജനകീയ കൂട്ടായ്മകള്‍ ഓയോയോട് ആവശ്യപ്പെട്ടിരുന്നു. ഇതാണ് ഇത്തരം ഒരു നീക്കത്തിലേക്ക് ഓയോയെ നയിച്ചതെന്നാണ് റിപ്പോര്‍ട്ട്. വ്യക്തിസ്വാതന്ത്ര്യത്തെ മാനിക്കുമ്പോള്‍ തന്നെ വിപണിയിലെ നിയമപാലകരുടെയും ജനകീയ കൂട്ടായ്മകളെയും കേള്‍ക്കേണ്ട ഉത്തരവാദിത്വം തങ്ങള്‍ക്കുണ്ട്. ഈ നയമാറ്റവും അതിന്‍റെ അനന്തര ഫലങ്ങളും തങ്ങള്‍ വിശകലനം ചെയ്യുമെന്നും ഓയോ നോര്‍ത്ത് ഇന്ത്യ റീജ്യന്‍ ഹെഡ് പവസ് ശര്‍മ പറഞ്ഞു.