വളർത്തു പൂച്ചകളെ അയൽവാസി കൊന്നു ഭക്ഷിച്ചതായി പൊലീസിൽ പരാതി. കോട്ടയം എസ്.എച്ച്.മൗണ്ട് കദളിമറ്റത്തിൽ (പൈനുംമൂട്ടിൽ) സഞ്ജു സ്റ്റീഫനാണ് കഴിഞ്ഞദിവസം ഗാന്ധിനഗർ പൊലീസിൽ പരാതി നൽകിയത്. സഞ്ജുവിന്റെ വീട്ടിൽ വളർത്തിയിരുന്ന പൂച്ചകളിൽ 2 എണ്ണത്തിനെ അയൽവാസി വെടിവച്ചതായാണ് ആരോപണം.
പൂച്ചകളിൽ ഒന്നിന്റെ തലയുടെ ഭാഗത്തും മറ്റൊന്നിന്റെ വയറിനുമാണ് വെടിയേറ്റത്. വയറിന് വെടിയേറ്റ പൂച്ച തിരികെ വീട്ടിലെത്തി. പ്രാഥമിക ചികിത്സ നൽകിയെങ്കിലും പൂച്ച ചത്തു. വെടിയേറ്റശേഷം തിരികെ വരാതിരുന്ന പൂച്ചയെ അയൽവാസി പാകം ചെയ്തു ഭക്ഷിച്ചുവെന്നാണ് സഞ്ജുവിന്റെ പരാതി. കലക്ടറേറ്റിലെ ആനിമൽ ഹസ്ബൻട്രി ഓഫിസിലും ഫ്രണ്ട്സ് ഓഫ് ആനിമൽ സംഘടനയ്ക്കും പരാതി നൽകിയിട്ടുണ്ട്.