കാന്‍സര്‍ ബാധിച്ച് മരിച്ച പ്രശസ്ത പിന്നണി ഗായിക രാധികാ തിലകിന് മകളുടെ സംഗീതാദരം. അമ്മപ്പാട്ടുകൾ കോര്‍ത്തിണക്കി മകൾ ദേവിക സുരേഷ് ഒരുക്കിയ കവർ സോങ്ങ് നിർമിച്ചിരിക്കുന്നത് ഗായിക ശ്വേതാ മോഹനാണ് . ശ്വേതയുടം യൂട്യൂബ് ചാനലിലൂടെയാണ് ഗാനം പുറത്തുവിട്ടത്. രാധിക പാടിയതിൽ ഏറ്റവും പ്രശസ്തമായ മായാമഞ്ചലിൽ, കാനന കുയിലേ, ദേവസംഗീതം നീയല്ലേ എന്നീ ഗാനങ്ങളാണ് ദേവിക പാടിയത്. അമ്മയ്ക്കുള്ള സ്നേഹാദരമായാണ് ദേവിക മെഡ്‌ലി ഒരുക്കിയത്. കീബോർഡിൽ ഈണമിട്ട് ശ്വേതയും ഒപ്പം കൂടുന്നുണ്ട്യ. അകാലത്തിൽ വേർപെട്ടു പോയ അമ്മയുടെ ഓർമകളുണർത്തിയാണ് ദേവികയുടെ പാട്ട്. മെഡ്‌ലി ഒരുക്കാൻ എല്ലാ പിന്തുണയും നൽകി ഒപ്പം നിന്ന സുജാതയ്ക്കും ശ്വേതയ്ക്കും സുഹൃത്തുക്കൾക്കും നന്ദി അറിയിച്ചു കൊണ്ടാണ് ദേവിക് പാട്ട് പുറത്തിറക്കിയത്.
''എന്നും എന്നോടൊപ്പമുള്ള എന്റെ അമ്മയ്ക്കുള്ള സ്നേഹാദരമാണിത്. അമ്മയുടെ മൂന്ന് ജനപ്രിയ ഗാനങ്ങൾ ഞാൻ പുനരവതരിപ്പിക്കാൻ ശ്രമിച്ചപ്പോൾ കീബോർഡിൽ മാന്ത്രിക ഈണവുമായി ശ്വേത ചേച്ചി ഒപ്പം ചേർന്നു. കുറച്ചു കാലമായി ഞാൻ ഇത്തരത്തിൽ വിഡിയോ ചെയ്യണമെന്ന് ആഗ്രഹിച്ചിരുന്നു. പക്ഷേ, സംഗീതത്തിൽ ശരിയായ പരിശീലനം ലഭിക്കാത്തതിനാൽ ഞാൻ അതിൽ നിന്നും സ്വയം മാറി നിൽക്കുകയായിരുന്നു. ഒരു മികച്ച ഗായികയാണെന്ന് ഞാൻ എന്ന് കരുതുന്നില്ല. എങ്കിലും ഇതെന്റെ അമ്മയ്ക്കു വേണ്ടി'', പാട്ട് പങ്കുവച്ച് ദേവിക കുറിച്ചു.
അമ്മയ്ക്കൊപ്പമുള്ള ഓർമച്ചിത്രങ്ങൾ നോക്കി നിൽക്കുന്ന ദൃശ്യത്തോടെയാണ് വിഡിയോ ആരംഭിക്കുന്നത്. ശരതിന്റെ സംഗീതത്തിൽ ‘ഒറ്റയാൾപ്പട്ടാളം’ എന്ന ചിത്രത്തിനു വേണ്ടി ജി.വേണുഗോപാലും രാധിക തിലകും ചേർന്നു പാടിയ മായമഞ്ചലിൽ എന്ന ഗാനമാണ് ദേവിക ആദ്യം ആലപിച്ചത്. തുടർന്ന് മിസ്റ്റർ ബ്രഹ്മചാരിയിൽ മോഹൻ സിത്താര സംഗീതം നൽകി എം.ജി.ശ്രീകുമാറിനൊപ്പം രാധിക പാടിയ ‘കാനനക്കുയിലേ’ എന്ന ഗാനം ദേവിക പാടി. പാട്ടിൽ ഇടയ്ക്ക് ‘മറക്കില്ല നിന്നെ’ എന്ന ഭാഗമെത്തിയപ്പോള്‍ അമ്മയുടെ ഓർമകളിൽ വിതുമ്പി ദു:ഖത്താൽ മുഖം മറച്ച ദേവിക പ്രേക്ഷകർക്കു നൊമ്പരക്കാഴ്ചയായി.
‘ഗുരു’ എന്ന ചിത്രത്തിൽ ഇളയരാജുടെ സംഗീതത്തിൽ കെ.ജെ.യേശുദാസും രാധികയും ചേർന്നാലപിച്ച ‘ദേവസംഗീതം നീയല്ലേ’ എന്ന ഗാനം പാടിയാണ് ദേവിക മെഡ്‌ലി അവസാനിപ്പിക്കുന്നത്.
2015–സെപ്റ്റംബർ 20നാണ് അർബുദം ബാധിച്ച് രാധികാ തിലക് അന്തരിച്ചത്. ഒരുപാടില്ലെങ്കിലും പാടിയ ചലച്ചിത്രഗാനങ്ങളെല്ലാം ഹിറ്റ് ആണ്. കന്മദത്തിലെ മഞ്ഞക്കിളിയുടെ മൂളിപ്പാട്ടുണ്ടോ, നന്ദനത്തിലെ മനസിൽ മിഥുനമഴ, ദീപസ്തംഭം മഹാശ്ചര്യത്തിലെ എന്റെ ഉള്ളുടുക്കും കൊട്ടി എന്നിവയിലൂടെയെല്ലാം മലയാളികൾ ഇന്നും രാധികയെ ഓർക്കുന്നുണ്ട്.