കുത്താനായി പിന്നാലെ വന്ന കാട്ടാനയില്‍ നിന്ന് രക്ഷപ്പെടാന്‍ ചാടി മരത്തില്‍ കയറിയ തൊഴിലാളിയുടെ വിഡിയോയാണ് ഇപ്പോള്‍ സൈബറിടത്ത് വൈറല്‍. ഗൂഡല്ലൂരിനടുത്ത് സിൽവർ ക്ലൗഡിന്റെ കാപ്പിത്തോട്ടത്തിലാണ് സംഭവം. കാപ്പിത്തോട്ടത്തിൽ കാടു വെട്ടിക്കൊണ്ടിരിക്കെയാണ് ജാർഖണ്ഡിൽ നിന്നുള്ള തൊഴിലാളികൾക്കു നേരെ കാട്ടാന പാഞ്ഞടുത്തത്.
സെക്കൻഡുകൾകൊണ്ട് യുവാക്കൾ സമീപത്തെ മരങ്ങളിലേക്കു പാ‍ഞ്ഞു കയറി. മറ്റൊരു മരത്തിൽ കയറി രക്ഷപ്പെട്ട തൊഴിലാളിയാണ് ഈ വിഡിയോ ദൃശ്യം പകർത്തിയത്. യുവാവ് മരത്തിൽ പിടിമുറുക്കാൻ പാടുപെടുന്നതും കാൽ വഴുതി താഴേക്കു വീഴാൻ പോകുന്നതും ദൃശ്യങ്ങളിൽ കാണാം. സമീപത്തെ മരത്തിൽ കയറിയ രണ്ടാമനാണ് രംഗം മൊബൈലിൽ പകർത്തിയത്. മരംപിടിച്ചു കുലുക്കാനോ ആക്രമിക്കാനോ ആന തുനിയാത്തത് ഇവർക്ക് രക്ഷയായി.