പ്ലസ്ടു പരീക്ഷയിൽ മലപ്പുറം പൊന്നാനി മാറഞ്ചേരി ഗവ.ഹയർസെക്കൻഡറി സ്കൂളിലെ ഇരട്ട സഹോദരിമാർക്ക് ഇരട്ടിമധുരം. കാഞ്ഞിരമുക്ക് വലിയ വീട്ടിൽ വിജയൻ രുഗ്‍മിണി ദമ്പതികളുടെ മക്കളായ നന്ദ വിജയനും വൃന്ദ വിജയനുമാണ് 1200ൽ 1200 മാർക്കും നേടി ചരിത്ര വിജയം നേടിയത്.
ഒന്നാം ക്ലാസ് മുതൽ പ്ലസ്ടു വരെ ഒരേ ക്ലാസിലായിരുന്നു ഇരുവരും. എസ്എസ്എൽസി പരീക്ഷയിലും നന്ദയ്ക്കും വൃന്ദയ്ക്കും ഫുൾ എ പ്ലസ് ലഭിച്ചിരുന്നു. മികച്ച വിജയം നേടുമെന്ന് എല്ലാവര്‍ക്കും ഉറപ്പായിരുന്നെങ്കിലും മുഴുവന്‍ മാര്‍ക്കു നേടിയതിലുമുളള സാദൃശ്യമാണ് അല്‍ഭുതപ്പെടുത്തിയത്.
അച്‍ഛന്റെ നിർബന്ധ പ്രകാരമാണ് സർക്കാർ സ്കൂളിൽ തന്നെ പ്ലസ്ടു വരെ പഠിച്ചത്. പ്രാഥമിക വിദ്യാഭ്യാസം കാഞ്ഞിരമുക്ക് പി.എൻ.യു. പി സ്കൂളിലും ഹൈസക്കൂൾ വിദ്യാഭ്യാസം പൊന്നാനി വിജയമാത ഹൈസ്കൂളിലുമായിരുന്നു. സെപ്റ്റംബറിൽ നടക്കുന്ന നീറ്റ് പരീക്ഷ എഴുതാനുള്ള ഒരുക്കത്തിലാണ് വൃന്ദയും നന്ദയും. അമ്മ രുഗ്‍മിണി കോക്കൂർ ടെക്നിക്കൽ സ്കൂളിലെ അധ്യാപികയാണ്.