നിരവധി മലയാള സിനിമകളുടെ എഡിറ്ററായ നിഷാദ് യൂസഫ് മരിച്ച നിലയിൽ. കൊച്ചി പനമ്പിള്ളിനഗറിലെ ഫ്ലാറ്റിൽ ഇന്ന് പുലർച്ചെയാണ് നിഷാദിനെ മരിച്ച നിലയിൽ കണ്ടെത്തിയത് . മൃതദേഹം എറണാകുളം ജനറൽ ആശുപത്രിയിൽ പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുകൊടുക്കും.
ജനശ്രദ്ധയാകർഷിച്ച ഒരുപിടി നല്ല ചിത്രങ്ങളുടെ എഡിറ്റർ. ചാവേർ, ഉണ്ട, സൗദി വെള്ളക്ക,ഓപ്പറേഷൻ ജാവ, തല്ലുമാല തുടങ്ങി ഒട്ടേറെ ചിത്രങ്ങൾ. മമ്മൂട്ടിയുടെ ബസൂക്ക, സൂര്യയുടെ ബിഗ് ബജറ്റ് ചിത്രം കങ്കുവ, എൽ 360 തുടങ്ങി പുറത്തിറങ്ങാൻ ഇനിയും ഒട്ടേറെ ചിത്രങ്ങളുള്ളപ്പോഴാണ് നിഷാദിന്റെ അപ്രതീക്ഷിത വിയോഗം. 2022 -ല്‍ തല്ലുമാല സിനിമയുടെ എഡിറ്റിങ്ങിന് മികച്ച എഡിറ്റര്‍ക്കുള്ള സംസ്ഥാന അവാര്‍ഡ് ലഭിച്ചിട്ടുണ്ട്.ഹരിപ്പാട് സ്വദേശിയാണ് നിഷാദ് യൂസഫ്. ഭാര്യയ്ക്കും രണ്ട് മക്കള്‍ക്കും ഒപ്പമാണ് കൊച്ചി പനമ്പള്ളി നഗറിലെ ഫ്ലാറ്റില്‍ താമസിച്ചിരുന്നത്.
മലയാള ചലച്ചിത്ര രംഗത്തെ പ്രമുഖർ നിഷാദ് യൂസഫിന്‍റെ അകാല വിയോഗത്തില്‍ ആദരാഞ്ജലി അര്‍പിച്ചു.