മദ്യപിച്ച് ബഹളംവച്ച് മലയാളി; വിമാനം അടിയന്തരമായി തിരിച്ചിറക്കി

മദ്യപിച്ച് ലക്കുകെട്ട യാത്രക്കാരന്‍റെ ബഹളത്തെ തുടര്‍ന്ന് ദുബായില്‍ വിമാനം തിരിച്ചിറക്കി. ദുബായില്‍ നിന്ന് കരിപ്പൂര്‍ വിമാനത്താവളത്തിലേക്ക് തിരിച്ച വിമാനമാണ് അടിയന്തരമായി തിരിച്ചിറക്കേണ്ടി വന്നത്. കരിപ്പൂര്‍ വിമാനത്താവളത്തില്‍ പുലര്‍ച്ചെ ഏഴു മണിക്ക് എത്തേണ്ടിയിരുന്ന വിമാനം വൈകി 10.30നാണ് ലാന്‍ഡ് ചെയ്തത്. 

ഫ്ലൈ ദുബായ് എന്ന വിമാനത്തിലായിരുന്നു മദ്യപിച്ച് മലയാളി ബഹളം വച്ചത്. വിമാനം തിരിച്ചിറക്കിയ ഉടന്‍ തന്നെ ഇയാളെ ദുബായ് പൊലീസ് കസ്റ്റഡിയിലെടുത്തു. വേങ്ങര സ്വദേശിയാണ് വിമാനത്തില്‍ പ്രശ്നമുണ്ടാക്കുകയും സഹയാത്രികര്‍ക്ക് ശല്യമാകുംവിധം പെരുമാറുകയും ചെയ്തത്.

മറ്റ് യാത്രക്കാര്‍ക്ക് ശല്യമായതോടെ വിമാനം തിരിച്ചിറക്കുകയല്ലാതെ വേറെ വഴിയില്ലായിരുന്നുവെന്നാണ് അധികൃതര്‍ വ്യക്തമാക്കി. യാത്രക്കാരില്‍ നിന്ന്   വിവരങ്ങള്‍ ശേഖരിച്ച ശേഷമാണ് ദുബായി പൊലീസ് ഇയാളെ കസ്റ്റഡിയിലെടുത്തത്.