കോട്ടയം നസീര്‍ എന്ന കലാകാരനെ എല്ലാവര്‍ക്കും അറിയാം, പക്ഷെ ചിത്രകാരനായ നസീറിനെക്കുറിച്ച് കേട്ടുകേള്‍വി പോലും കാണില്ല. എറണാകുളം ദര്‍ബാര്‍ ഹാളില്‍ ആരെയും വിസ്മയിപ്പിക്കുന്ന കാഴ്ചകളുമായി കോട്ടയം നസീര്‍ വരച്ച ചിത്രങ്ങളുടെ പ്രദര്‍ശനം നടക്കുന്നുണ്ട്. ഡ്രീംസ് ഓഫ് കളേഴ്സ് എന്ന പ്രദര്‍ശനം ഈ മാസം 18വരെയാണ്.
ചിത്രങ്ങള്‍ക്കുള്ളിലെ ചിത്രങ്ങളടക്കം അവിശ്വസനീയമായ കാഴ്ചകളാണ് പ്രദര്‍ശനത്തില്‍ നസീര്‍ ഒരുക്കി വച്ചിരിക്കുന്നത്. ഒരു ലോകോത്തര ചിത്രകാരന്റെ സൃഷ്ടികളാണെന്ന് തോന്നുന്ന തരത്തിലുള്ള പെയ്ന്റിങ്ങുകള്‍. കാടിന്റെ വന്യതയും സൗന്ദര്യവും ഒരുപോലെ പകര്‍ന്നുതരുന്ന ചിത്രങ്ങള്‍ കാഴ്ച്ചക്കാരെ വിസ്മയിപ്പിച്ചു. കോട്ടയം നസീര്‍ ചിത്രം വരക്കുമെന്ന് അടുത്ത സുഹൃത്തുക്കള്‍ക്ക് അറിയാവുന്നതാണ്. എന്നാല്‍ ഇത്രയും പ്രതീക്ഷിച്ചില്ലെന്ന് സംവിധായകന്‍ സിദ്ധിഖ് പറഞ്ഞു.
ചിത്രരചന തനിക്ക് ഒരു ലഹരിയാണെന്നും ആ മനോഭാവമാണ് തിരക്കുകള്‍ക്കിടയിലും വരയ്ക്കാന്‍ സമയം കണ്ടെത്തുന്നതെന്നും നസീര്‍ പറഞ്ഞു. സലീം കുമാര്‍, ജനാര്‍ദനന്‍, ടിനി ടോം തുടങ്ങി ചലചിത്ര മേഖലയിലെ പ്രമുഖര്‍ പ്രദര്‍ശനം കാണാന്‍ എത്തി.