കവിരാജിനെ ഓർമയുണ്ടാകും. കല്യാണരാമൻ സിനിമ കണ്ടവരാരും ഇദ്ദേഹത്തെ മറക്കാനിടയില്ല. 'നിറം' മുതൽ അൻപതോളം സിനിമകളിൽ അഭിനയിച്ച കവിരാജ് ഇപ്പോൾ അണിഞ്ഞിരിക്കുന്ന ജീവിതവേഷം മാപ്രംപള്ളി ഭദ്രകാളി ക്ഷേത്രത്തിലെ പൂജാരിയുടേതാണ്. എന്നാൽ, കലാജീവിതം കൈവിട്ടിട്ടില്ലെന്നും നല്ല വേഷങ്ങൾ കിട്ടിയാൽ അഭിനയത്തിലേക്കു തിരിച്ചെത്തുമെന്നും കവിരാജ് പറയുന്നു.
ഇല്ലായ്മകളിലാണു കവിരാജിന്റെ ജീവിതം തുടങ്ങുന്നത്. ആലപ്പുഴയിൽ സ്റ്റീൽപാത്ര വിൽപന തുടങ്ങിയ ആദ്യകാല കടകളിലൊന്ന് കവിരാജിന്റെ പിതാവ് സുബ്രഹ്മണ്യൻ ആചാരിയുടേതാണ്. സ്വർണപ്പണിയും വ്യാപാരവുമൊക്കെയുണ്ടായിരുന്നെങ്കിലും അതെല്ലാം നഷ്ടത്തിലായി. 6 മക്കളെയും കൊണ്ട് ഒന്നുമില്ലായ്മയിലേക്ക് ഇറങ്ങിവന്നു ആ അച്ഛൻ. പിതാവ് കാൻസർ ബാധിച്ചു മരിച്ചതോടെ ജീവിതം നടുക്കടലിൽ പെട്ടതുപോലെയായി. അമ്മ സരസ്വതി അമ്മാളായി പിന്നെ ലോകം. 10ാം ക്ലാസിൽ എത്തിയതോടെ സ്വർണപ്പണി തുടങ്ങി.
പഠനവും ജോലിയും ഒന്നിച്ചു കൊണ്ടുപോകാനാവാതെ വന്നു. ഇതിനിടെയാണ് നാടുവിട്ട് കോടമ്പക്കത്ത് എത്തുന്നത്. ഒരു സുഹൃത്തിനെ യാദൃച്ഛികമായി കണ്ടുമുട്ടി. അയാൾക്കൊപ്പം എത്തിയത് ഹൈദരാബാദിലെ നൃത്തപഠനകേന്ദ്രത്തിൽ. നൃത്തം പഠിച്ചു, ഒപ്പം ജൂനിയർ ആർട്ടിസ്റ്റായി. കിട്ടുന്ന തുക വീട്ടിലേക്കയയ്ക്കും. സഹോദരിയുടെ ഭർത്താവ് മരിച്ചതോടെ ആ കുടുംബത്തെയും ഒപ്പം കൂട്ടി.നിറത്തിനു ശേഷം കല്യാണരാമൻ, തെങ്കാശിപ്പട്ടണം, കുഞ്ഞിക്കൂനൻ, രണ്ടാംഭാവം, മഴത്തുള്ളിക്കിലുക്കം തുടങ്ങി ഒട്ടേറെ സൂപ്പർഹിറ്റ് സിനിമകളുടെ ഭാഗമായി.
പിന്നീട് സീരിയൽ വേഷങ്ങളുടെ സുവർണകാലം. പ്രമുഖ ചാനൽ പരമ്പരകളിൽ വില്ലനും നായകനുമായി നിറഞ്ഞു. ഇതിനിടെയാണ് കൊല്ലം സ്വദേശിനി അനു ജീവിതത്തിലേക്കെത്തുന്നത്.ജീവിത്തിൽ കാലുറപ്പിച്ചു വന്നപ്പോഴാണ് അമ്മയുടെ മരണം. അമ്മകൂടി പോയതോടെ ആത്മീയതയിലേക്കു കൂടുതൽ അടുത്തു. മന്ത്രങ്ങളും മറ്റും പഠിച്ചുതുടങ്ങി. മകൻ ജനിച്ച് കുറച്ചുനാളുകളേ ആയിരുന്നുള്ളൂ. ആത്മീയതയിലേക്കു തിരിഞ്ഞതോടെ ഭാര്യയ്ക്ക് ആശങ്കയായി. വീട്ടുകാരെത്തി അനുവിനെ കൊണ്ടുപോയി. അപ്പോഴാണ് ശരിക്കും ഒറ്റപ്പെടൽ കവിരാജ് അറിയുന്നത്. അങ്ങനെയാണ് ഹിമാലയ യാത്ര തുടങ്ങിയത്.
ബദരീനാഥ് ക്ഷേത്രത്തിലാണ് അത് അവസാനിച്ചത്. പുതിയ ജന്മമെടുക്കുകയാണെന്ന തോന്നൽ ഉണ്ടായത് അവിടെ നിന്നാണ്. തിരിച്ചെത്തിയ ഉടൻ ഭാര്യയെ വിളിച്ചു. നാട്ടിലെത്തി, പതിയെ ക്ഷേത്രപൂജകളിലും സപ്താഹങ്ങളിലും ഭാഗമായി. മള്ളിയൂർ ശങ്കരൻ നമ്പൂതിരി നൽകിയ ഭാഗവതമാണ് അമൂല്യസമ്മാനമായി കണക്കാക്കുന്നത്. ഇതിനിടെ ആലപ്പുഴ മുല്ലയ്ക്കൽ ക്ഷേത്രത്തിനു സമീപം വീടുപണിതു. അവിടേക്ക് 2015ൽ മകൻ ശ്രീബാലഗോപാല നാരായണനുമെത്തിയതോടെ ജീവിതത്തിൽ സന്തോഷം തിരികെ കിട്ടി.