സിബിഐ അഞ്ചാം ഭാഗത്തിന്റെ െലാക്കേഷനിലെത്തി മമ്മൂട്ടി. അദ്ദേഹം തന്നെയാണ് വിഡിയോ പങ്കിട്ട് ഇക്കാര്യം അറിയിച്ചത്. ഫെയ്സ്ബുക്കിൽ പങ്കുവച്ച വിഡിയോ ഇപ്പോൾ വൈറലാണ്. സിബിഐ5 സെറ്റിൽ ജോയിൻ ചെയ്തു എന്ന് കുറിച്ചാണ് അദ്ദേഹം വിഡിയോ പങ്കിട്ടത്. ഒപ്പം മലയാളിക്ക് ഏക്കാലത്തും പ്രിയപ്പെട്ട സിബിഐ ബിജിഎമ്മും വിഡിയോയ്ക്ക് ഒപ്പമുണ്ട്. കൊച്ചിയിൽ സിനിമയുടെ ചിത്രീകരണം പുരോഗമിക്കുകയാണ്.
കെ. മധുവാണ് സിനിമ സംവിധാനം ചെയ്യുന്നത്. എസ്.എൻ. സ്വാമിയാണ് തിരക്കഥ. സ്വര്‍ഗ്ഗചിത്ര അപ്പച്ചനാണ് സിനിമ നിർമിക്കുന്നത്. എറണാകുളം, തിരുവനന്തപുരം, ഹൈദരാബാദ്, ന്യൂഡൽഹി എന്നിവിടങ്ങളിലായി ഒറ്റ ഷെഡ്യൂളിൽ ചിത്രീകരണം പൂർത്തിയാക്കാനാണ് ഉദ്ദേശ്യം. മുകേഷും സായികുമാറും അടക്കം പഴയ ടീമിൽ ഉണ്ടായിരുന്നവർക്കു പുറമേ രണ്‍ജി പണിക്കര്‍, രമേഷ് പിഷാരടി, ദിലീഷ് പോത്തന്‍, സൗബിന്‍ ഷാഹിര്‍, ആശ ശരത്ത്, മാളവിക മേനോൻ തുടങ്ങിയ താരങ്ങളും പുതുമുഖ അഭിനേതാക്കളും ഈ സിനിമയിലുണ്ട്.