‘മോദി പഴശ്ശിരാജ എന്ന് കേട്ടിട്ടുണ്ടോ..?’; വയനാടിനെതിരായ നിലപാടില്‍ ചരിത്രം പഠിപ്പിച്ച് കോണ്‍ഗ്രസ്
പരാജയഭീതിയിലായ പ്രതിപക്ഷനേതാക്കൾ ഹിന്ദു മേഖലകളിൽനിന്ന് ഒളിച്ചോടുകയാണെന്ന പ്രധാനമന്ത്രിയുടെ വിവാദ വര്‍ഗീയ പരാമർശത്തിനെതിരെ കോൺഗ്രസ്. രാഹുൽഗാന്ധിയുടെ വയനാട് സ്ഥാനാർഥിത്വത്തെ വിമർശിച്ചായിരുന്നു മോദിയുടെ പ്രസംഗം. ബ്രിട്ടീഷുകാര്‍ക്കെതിരെ പോരാടിയ പഴശ്ശിരാജയുടെ ചരിത്രമുള്ള നാടാണ് വയനാടെന്നും മോദിക്ക് അത് അറിയുമോയെന്നും കോണ്‍ഗ്രസ് ട്വീറ്ററിൽ കുറിച്ചു. മോദി ദക്ഷിണേന്ത്യയോട് മാപ്പ് പറയണം. പ്രധാനമന്ത്രി രാജ്യത്തിന്റെ മതേതരത്വത്തെ അപമാനിക്കുകയാണെന്നും കോണ്‍ഗ്രസ് കൂട്ടിച്ചേര്‍ത്തു.
വരാന്‍ പോകുന്ന തിരഞ്ഞെടുപ്പില്‍ പരാജയം മുന്നില്‍ കണ്ട് ഇന്ത്യയുടെ സംസ്‌കാരത്തെ അപമാനിക്കുന്ന നിലയിലേക്ക് വരെ മോദി എത്തിച്ചേര്‍ന്നു. വെറുപ്പിന്റെ വിത്തുകള്‍ വിതച്ച് വിലകുറഞ്ഞ രാഷ്ട്രീയമാണ് മോദി കളിക്കുന്നത്. വ്യത്യസ്ത മതവിഭാഗങ്ങളില്‍ പെട്ടവര്‍ ദക്ഷിണേന്ത്യയില്‍ ജീവിക്കുന്നില്ലേ? രാഹുല്‍ ഗാന്ധി ഇന്ത്യയെ ഒന്നിപ്പിക്കാനാണ് ശ്രമിക്കുന്നത്. മതത്തിന്റേയും സംസ്‌കാരത്തിന്റേയും ഭാഷകളുടേയും പേരില്‍ രാജ്യത്തെ ഭിന്നിക്കലാണ് മോദിയുടെ ലക്ഷ്യം. മതപരമായി ജനത്തെ വേര്‍തിരിച്ചതിലൂടെ മോദി ജന പ്രതിനിധി നിയമത്തിന്റെ 123-ാം വകുപ്പ് ലംഘിച്ചെന്നും കോണ്‍ഗ്രസ് ചൂണ്ടിക്കാട്ടി.
ഹിന്ദുമേഖലയില്‍ നിന്നും ന്യൂനപക്ഷമേഖലയിലേക്ക് രാഹുൽ മത്സരിക്കാന്‍ ഓടിപ്പോയെന്നും മോദി പറഞ്ഞിരുന്നു. രാഹുല്‍ ഗാന്ധിയുടെ വയനാട് സ്ഥാനാര്‍ത്ഥിത്വം പരോക്ഷമായി സൂചിപ്പിച്ചുകൊണ്ടായിരുന്നു മോദിയുടെ പ്രസ്താവന. മഹാരാഷ്ട്ര വാര്‍ധയിലെ തെരഞ്ഞെടുപ്പ് റാലിക്കിടെയാണ് പ്രധാനമന്ത്രി വിവാദ പരാമര്‍ശങ്ങള്‍ നടന്നത്.
