‘അതെ, ഇതു ഞാൻ തന്നെയാണ്..’ സമൂഹമാധ്യമങ്ങളിൽ വ്യാപകമായി പ്രചരിച്ച ചിത്രം പങ്കുവച്ച് അബ്ദുൾ നാസർ മഅദ്നി ഫെയ്സ്ബുക്കിൽ കുറിച്ചു. മഅദ്നിയുടെ ചെറുപ്പത്തിലെ ചിത്രം എന്ന തലക്കെട്ടോടെയാണ് ചിത്രം സോഷ്യൽ ലോകത്ത് പ്രചരിച്ചത്. ഒരു കുട്ടി സമ്മാനം വാങ്ങുന്ന ചിത്രം മഅദ്നിയുടെതാണോ എന്ന് പലർക്കും സംശയം തോന്നിയിരുന്നു. ചിലർ അദ്ദേഹത്തിന് തന്നെ ഇൗ ചിത്രം അയച്ചുകൊടുത്ത് അന്വേഷിക്കുകയും ചെയ്തിരുന്നു.
ഇപ്പോഴിതാ മഅദ്നി തന്നെ അക്കാര്യം ഉറപ്പിക്കുകയും ചെയ്തു. ആ ചിത്രത്തിലുള്ള കുട്ടി ഞാൻ തന്നെയാണെന്ന്. കൊല്ലം ജില്ലാ കലോത്സവത്തിൽ ജില്ലാ അടിസ്ഥാനത്തിൽ നടന്ന പ്രസംഗമത്സരത്തിൽ ഒന്നാം സ്ഥാനം ലഭിച്ചപ്പോൾ സമ്മാനം വാങ്ങുന്ന ചിത്രമാണിതെന്ന് മഅദ്നി പറയുന്നു.
ഫെയ്സ്ബുക്ക് കുറിപ്പിന്റെ പൂർണരൂപം
അതെ,ഇതു ഞാൻ തന്നെയാണ്....
കഴിഞ്ഞ കുറേ നാളുകളായി "മഅദനിയുടെ ചെറുപ്പത്തിലെ ഫോട്ടോ"എന്ന അടിക്കുറിപ്പോടെ ഇങ്ങനെ ഒരു ഫോട്ടോ പ്രചരിക്കുന്നുണ്ട് ഇതിന്റെ വിശ്വാസ്യത ഉറപ്പുവരുത്താൻ പലരും എനിക്ക് ഫോട്ടോ അയച്ചുതന്ന് അന്വഷിക്കുന്നുമുണ്ട്. അതേ, ഈ ഫോട്ടോ എന്റേതു തന്നെയാണ് മൈനാഗപ്പള്ളി മിലദേശരിഫ് ഹൈസ്കൂളിൽ ആറാം ക്ലാസ്സ് വിദ്യാർഥിയായിരുക്കുമ്പോൾ കൊല്ലം ജില്ലാ കലോത്സവത്തിൽ ജില്ലാ അടിസ്ഥാനത്തിൽ നടന്ന പ്രസംഗമത്സരത്തിൽ ഒന്നാം സ്ഥാനം കാരസ്ഥമാക്കിയതിനു അന്നത്തെ ജില്ലാകളക്ടർ ശ്രീ ബാബുജ
ജേക്കബ് ആണ് സമ്മാനം നൽകുന്നത്.(അദ്ദേഹം പിന്നീട് ചീഫ് സെക്രട്ടറി ആയി റിട്ടയർ ചെയ്തു)
എന്റെ പ്രസംഗ രംഗത്തെ ഏക ഗുരു എന്റെ പ്രിയ വാപ്പ അബ്ദുസ്സമദ്മാസ്റ്റർ ആയിരുന്നു ഓരോ മത്സരങ്ങൾക്കും പ്രസംഗം പഠിപ്പിച്ച ശേഷം വീട്ടിലെ ഹാളിൽ ഒരു സ്റ്റൂളിന്റെ മുകളിൽ എന്നെ കയറ്റിനിർത്തി പ്രസംഗിപ്പിക്കും എന്റെ പ്രിയ ഉമ്മായും അനുജനുമായിരുക്കും ശ്രോതാക്കൾ മത്സരങ്ങൾക്കെല്ലാം വാപ്പായും കൂടെയുണ്ടാകും ഉമ്മായ്ക്കായിരിക്കും എന്നേക്കാൾ ടെൻഷൻ സമ്മാനവുമായി തിരിച്ചുവരുമ്പോഴാണ് ഉമ്മാക്ക് ആശ്വാസമാവുക അന്നും എന്നും എന്റെ പ്രിയ ഉമ്മാടെ പ്രാർഥനയായിരുന്നു എന്റെ ശക്തി. എന്റെ പ്രിയ പിതാവിന്റെ ദീർഘായുസിനും എന്റെ ഉമ്മായുടെ പരലോക സന്തോഷത്തിനും ഈ പോസ്റ്റ് കാണുന്ന ഓരോരുത്തരും പ്രാർത്ഥിക്കണം.....