പാഡഴിച്ച് ഗബ്ബര്‍; ശിഖര്‍ ധവാന്‍ വിരമിച്ചു

ഇന്ത്യന്‍ ഓപ്പണിങ് ബാറ്റര്‍ ശിഖര്‍ ധവാന്‍ ക്രിക്കറ്റില്‍ നിന്ന് വിരമിച്ചു. എല്ലാ ഫോര്‍മാറ്റില്‍ നിന്നുമാണ്  ധവാന്‍ വിരമിക്കല്‍ പ്രഖ്യാപിച്ചിരിക്കുന്നത്. 2022 ഡിസംബറില്‍ ബംഗ്ലാദേശിന് എതിരെയാണ് ധവാന്‍ അവസാനമായി ഇന്ത്യക്കായി ഏകദിന മത്സരം കളിച്ചത്. 

സമൂഹമാധ്യമങ്ങളില്‍ വിഡിയോ പങ്കുവെച്ചാണ് വിരമിക്കല്‍ വാര്‍ത്ത ധവാന്‍ ആരാധകരെ അറിയിച്ചത്. 2010ല്‍ ഇന്ത്യക്കായി ഏകദിനത്തില്‍ അരങ്ങേറ്റം കുറിച്ച ധവാന്‍ 167 മത്സരങ്ങള്‍ കളിച്ചു. 6793 റണ്‍സ് ആണ് ഏകദിനത്തിലെ സമ്പാദ്യം. ഉയര്‍ന്ന സ്കോര്‍ 143. 17 സെഞ്ചറിയും 39 അര്‍ധ ശതകവും ഏകദിനത്തില്‍ നിന്ന് ധവാന്‍ കണ്ടെത്തി. 

34 ടെസ്റ്റുകളില്‍ നിന്ന് 2315 റണ്‍സ് ആണ് ധവാന്‍ കണ്ടെത്തിയത്. ടെസ്റ്റില്‍ ഏഴ് സെഞ്ചറിയും അഞ്ച് അര്‍ധ ശതകവും ധവാന്‍ തന്റെ അക്കൗണ്ടില്‍ ചേര്‍ത്തു. 68 ട്വന്റി20 മത്സരങ്ങളില്‍ നിന്ന് 1759 റണ്‍സാണ് ധവാന്‍ സ്കോര്‍ ചെയ്തത്.