കരിയർ ഗ്രാഫ് ചലിച്ചത് ഉയരങ്ങളിലേക്ക് മാത്രം; ശ്രീശങ്കറിനിത് നേട്ടങ്ങളുടെ കാലം

 

ശ്രീശങ്കറിന്‍റെ കരിയർ ഗ്രാഫ് ഉയരങ്ങളിലേക്കു മാത്രം സഞ്ചരിച്ച വർഷമായിരുന്നു 2023. സാങ്കേതികത്തികവിലും ലോകോത്തര നേട്ടങ്ങളിലും ഇന്ത്യൻ അത്ലറ്റിക്സിന്റെ പൈലറ്റ് പ്രൊജക്ടാണ് പാലക്കാട്ടുകാരന്‍  എം.ശ്രീശങ്കർ. 

 

പാരിസ് ഒളിംപിക്സിനു യോഗ്യത നേടിയ ഇന്ത്യയുടെ ആദ്യ ട്രാക്ക് ആൻഡ് ഫീൽഡ് അത്ലീറ്റ്, ഡയമണ്ട് ലീഗ് ഫൈനൽസിനു യോഗ്യത നേടിയ ആദ്യ ഇന്ത്യന് ജംപർ, ലോക അത്ലറ്റിക്സ് ചാംപ്യൻഷിപ്പിൽ ഫൈനലിലെത്തിയ ആദ്യ പുരുഷ ലോങ്ജംപ് താരം തുടങ്ങിയ നേട്ടങ്ങളിൽ ഇന്ത്യ ഹരിശ്രീ കുറിച്ചത് പാലക്കാട്ടുകാരൻ ശ്രീശങ്കറിലൂടെയാണ്. 

 

പാരിസ് ഡയമണ്ട് ലീഗ് മീറ്റിൽ പുരുഷ ലോങ്ജംപിൽ മൂന്നാം സ്ഥാനം  നേടിയതായിരുന്നു 2023 സീസണിൽ ശ്രീശങ്കറിന്റെ ആദ്യ പ്രധാന നേട്ടം.  കോമൺവെൽത്ത് ഗെയിംസ് വെള്ളി മെഡലിനൊപ്പം ചേർത്തുവയ്ക്കാൻ ഏഷ്യൻ ഗെയിംസ്, ഏഷ്യൻ ചാംപ്യൻഷിപ്  വെള്ളി മെഡലുകൾക്കൂടി യാക്കരയിലെ വീട്ടിലേക്ക് എത്തിയ വർഷമാണ് കഴിഞ്ഞുപോയത്. കരിയറിലെ മികച്ച പ്രകടനം 8.41 മീറ്ററായി ഉയർത്തിയ ശ്രീശങ്കർ ലോക റാങ്കിങ്ങിൽ ആദ്യ പത്തിൽ കഴിഞ്ഞ വർഷം മുഴുവൻ സ്ഥാനം നിലനിർത്തി. 

 

അർജുന അവാർഡിന് കഴിഞ്ഞവർഷം അർഹരായ രാജ്യത്തെ 2 അത്ലീറ്റുകളിൽ ഒരാൾ ശ്രീശങ്കറായിരുന്നു. പാരിസ് ഒളിംപിക്സിന് മാസങ്ങൾ മാത്രം ബാക്കിനിൽക്കെ മലയാളികളുടെ മെഡൽ പ്രതീക്ഷകളിൽ ഇന്ധനം നിറച്ച് എം.ശ്രീശങ്കർ കുതിപ്പ് തുടരുകയാണ്