മദ്യലഹരിയിലായിരുന്ന വനിതാ സംഘം രാത്രി ബാറിന് മുന്‍പില്‍ പൊലീസിനെ ആക്രമിച്ചു. മുംബൈയ്ക്ക് അടുത്ത് വിരാറിലാണ് സംഭവം. ബാറിന് പരിസരത്ത് ബഹളംവെച്ച മൂന്നംഗ വനിതാ സംഘത്തെ അനുനയിപ്പിക്കാന്‍ എത്തിയ പൊലീസിനെയാണ് ഇവര്‍ മര്‍ദിക്കുകയും അസഭ്യം പറയുകയും ചെയ്തത്. വിഡിയോ റിപ്പോര്‍ട്ട് കാണാം.
മുംബൈയ്ക്ക് അടുത്തുള്ള വിരാര്‍ ഗോകുല്‍ ടൗണ്‍ഷിപ്പിലാണ് സംഭവം. രാത്രി ബാറില്‍ നിന്നും ഇറങ്ങിയ മൂന്ന് സ്ത്രീകള്‍ മദ്യലഹരിയില്‍ വന്‍ ബഹളം ഉണ്ടാക്കുന്നുവെന്ന പരാതിയെ തുടര്‍ന്നാണ് പൊലീസ് എത്തിയത്. പക്ഷേ അപ്പോള്‍ കാര്യം അതിലും കഷ്ടമായി. ആദ്യം അസഭ്യവര്‍ഷം. പിന്നീട് കണ്ടത് പൊലീസുമായുള്ള വാക്കേറ്റവും കയ്യാങ്കളിയും. ഒരു പൊലീസുകാരന്‍റെ തലയ്ക്ക് ബക്കറ്റുകൊണ്ട് അടിച്ചു. വനിതാ പൊലീസിനെ കടിക്കുകയും യുണിഫോം വലിച്ചുകീറുകയും ചെയ്തു. അതിനിടെ ഒരാള്‍ പൊലീസിന് നേരേ അശ്ലീല ആംഗ്യം കാണിച്ച് പ്രകോപനം. നാടകീയ രംഗങ്ങള്‍ ഏറെ നേരം തുടര്‍ന്നു.
അതേസമയം, ഒരു വനിത മറ്റുള്ളവരെ പിന്തിരിപ്പിക്കാന്‍ ശ്രമിക്കുന്നതും ദൃശ്യങ്ങളില്‍ കാണാം. ബാറില്‍ ജീവനക്കാരുമായി ബഹളമുണ്ടാക്കിയതിന്‍റെ തുടര്‍ച്ചയാണ് റോഡില്‍ കണ്ടത്. ഒടുവില്‍ ഇവരെ ബലപ്രയോഗത്തിലൂടെ ഓട്ടോയില്‍ കയറ്റിയാണ് പൊലീസ് സ്റ്റേഷനില്‍ എത്തിച്ചത്. കാവ്യ, അശ്വനി, പൂനം എന്നി മൂന്ന് പേരെയും കോടതി ഒരുദിവസത്തേക്ക് പൊലീസ് കസ്റ്റഡിയില്‍ വിട്ടു. ഏതായാലും ബാറിനുമുന്നിലുള്ള രാത്രി നാടകത്തിന്‍റെ ദൃശ്യങ്ങള്‍ സാമൂഹ്യമാധ്യമങ്ങളിലും വൈറലാണ്.