കൊച്ചിയിൽ യുവാവിനെ ബ്ലേഡ്കൊണ്ട് ആക്രമിച്ച് മൊബൈൽ കവർന്ന സംഘം പിടിയിൽ. യുവതിയടക്കം നാല് പേരെ നോർത്ത് പൊലീസാണ് മണിക്കൂറുകൾക്കകം പിടികൂടിയത്. നിരവധി മോഷണക്കേസുകളിൽ പ്രതികളാണ് പിടിയിലായ പ്രതികൾ. വിഡിയോ റിപ്പോര്‍ട്ട് കാണാം.
ജോലി കഴിഞ്ഞ് താമസസ്ഥലത്തേക്ക് നടന്ന് പോകുകയിരുന്ന കൊല്ലം സ്വദേശിയെയാണ് നാലംഗസംഘം കൊള്ളയടിച്ചത്. പുലർച്ചെ രണ്ടരക്ക് നോർത്ത് പാലത്തിനു മുകളിൽവെച്ചായിരുന്നു അപ്രതീക്ഷിത ആക്രമണം. യുവാവിനെ ആദ്യം സമീപിച്ചത് കവർച്ച സംഘത്തിലെ യുവതി ബിജി. സുഹൃത്തിനെ വിളിക്കാൻ ഫോൺ ആവശ്യപ്പെട്ട യുവതി യുവവിന്റെ ഫോൺ കൈവശപ്പെടുത്തി. അരലക്ഷം രൂപയുള്ള മൊബൈൽ തിരികെ ആവശ്യപ്പെട്ടതോടെ യുവതി എതിർത്തു. തൊട്ടുപിന്നാലെ ഇരുട്ടിൽ ഒളിച്ചുനിന്ന മൂന്ന് യുവാക്കൾ ഓടിയെത്തി. കയ്യിൽ കരുതിയ ബ്ലേഡ് ഉപയോഗിച്ച് യുവാവിന്റെ കഴുത്തിൽ ആക്രമിച്ചു. പിന്നീട് ശരീരത്തിൽ പലയിടങ്ങളിൽ മുറിവേൽപ്പിച്ച് സംഘം കടന്നു. റോഡിലുണ്ടായിരുന്ന മറ്റുള്ളവരുടെ സഹായത്തോടെ യുവാവ് പൊലീസിനെ വിവരം അറിയിച്ചു. മണിക്കൂറുകൾക്കകം നാലംഗ കവർച്ചാസംഘത്തിലെ മൂന്നുപേരും പിടിയിലായി.
സംഘത്തിനെ നയിച്ച അലുവ സ്വദേശി അതുൽ ആദ്യം പിടികൊടുത്തില്ല. പിന്നീട് വൈകീട്ടോടെ ആലുവയിൽ നിന്ന് അതുലിന്റെയും നോർത്ത് പൊലീസ് പിടികൂടി. രതീഷ്, കൗമാരക്കാരനായ അരൂർ സ്വദേശി എന്നിവരാണ് അറസ്റ്റിലായ മറ്റ് രണ്ടുപേർ. ബിജിയൊഴികെ മറ്റ് മൂന്നുപേരും മോഷണമടക്കം നിരവധികേസുകളിൽ പ്രതികളാണ്. യുവാവിന്റെ ഫോണും ഇവരിൽ നിന്ന് പിടിച്ചെടുത്തു. നഗരത്തിൽ പലയിടങ്ങളിലും പ്രതികൾ സമാനമായ കവർച്ചക്ക് പദ്ധതിയിടുന്നുവെന്നാണ് വിവരം.