ഭാര്യയെ ശല്യം ചെയ്തത് ചോദ്യംചെയ്തു; കൊച്ചിയില്‍ അഭിഭാഷകന് ക്രൂരമര്‍ദനം

കൊച്ചിയില്‍ ഭാര്യയെ ശല്യം ചെയ്തത് ചോദ്യം ചെയ്ത അഭിഭാഷകന് നേരെ ലഹരിമാഫിയയുടെ ആക്രമണം. ഹൈക്കോടതി അഭിഭാഷകന്‍ നജുമുദിനും കുടുംബവും ബുധനാഴ്ച രാത്രി ഹൈക്കോടതിക്ക് സമീപമാണ് ആക്രമിക്കപ്പെട്ടത്. റോഡരികില്‍ നിന്ന ഭാര്യയെ ശല്യം ചെയ്യുന്നതുകണ്ട് ഓഫിസില്‍ നിന്ന് ഓടിയെത്തിയതാണ് നജുമുദിന്‍. ഇതോടെ അ‍ഞ്ചംഗസംഘം നജുമുദിനെതിരെ തിരിഞ്ഞു. കല്ലുകൊണ്ടും കൈകൊണ്ടും അക്രമികള്‍ അഭിഭാഷകനെ ആക്രമിച്ചു. ബഹളംകേട്ട് നാട്ടുകാര്‍ ഓടിക്കൂടിയതോടെ സംഘത്തിലെ മൂന്ന് പേര്‍ ഓടി രക്ഷപ്പെട്ടു.

മറ്റ് രണ്ട് പേരെ നാട്ടുകാര്‍ പിടികൂടി പൊലീസിനെ ഏല്‍പ്പിച്ചു. പള്ളുരുത്തി സ്വദേശി ജസ്റ്റിന്‍, കടവന്ത്ര സ്വദേശി വിഷ്ണു ബോബന്‍ എന്നിവരെ സെന്‍ട്രല്‍ പൊലീസ് അറസ്റ്റ് ചെയ്തു. പ്രതികള്‍ക്കെതിരെ വധശ്രമം ഉള്‍പ്പെടെയുള്ള വകുപ്പുകള്‍ ചുമത്തിയാണ് കേസെടുത്തത്.