ഉപജില്ലാ കലോല്‍സവത്തിനെത്തിയ വിദ്യാര്‍ഥിനിയോട് ലൈംഗീകാതിക്രമം നടത്തിയ പാരലല്‍ കോളജ് അധ്യാപകന്‍ അറസ്റ്റിലായി. കൊല്ലം കടയ്ക്കലിലാണ് അധ്യാപകനെ പൊലീസ് അറസ്റ്റ് ചെയ്തത്. വിഡിയോ റിപ്പോര്‍ട്ട് കാണാം.
കുമ്മിൽ മുക്കുന്നം സ്വദേശിയും പാരലല്‍ കോളജ് നടത്തിപ്പുകാരനും അധ്യാപകനുമായ അഫ്സൽ ജലാലാണ് പിടിയിലായത്. ചടയമംഗലം ഉപജില്ലാ കലോത്സവത്തിന് എത്തിയ പ്ലസ് വൺ വിദ്യാർഥിനിയെ കടന്നുപിടിച്ചെന്ന പരാതിയിലാണ് അഫ്സൽ ജലാല്‍ അറസ്റ്റിലായത്. അഫ്സലിന്റെ പാരലല്‍ കോളജും കലോല്‍സവത്തിനായി ഉപയോഗിച്ചിരുന്നു ഇവിടെ മൽസരത്തിൽ പങ്കെടുക്കാനെത്തിയ പ്ളസ് വണ്‍ വിദ്യാര്‍ഥിനിയെ അഫ്സൽ ജലാൽ കടന്നുപിടിക്കുകയായിരുന്നു.
മാനസിക സമ്മർദത്തിലായ പെണ്‍കുട്ടിയോട് വീട്ടുകാര്‍ വിശദമായി വിവരം തേടിയപ്പോഴാണ് പെണ്‍കുട്ടി കാര്യം വെളിപ്പെടുത്തിയത്. അഫ്സൽ നേരത്തെ പ്രണയാഭ്യര്‍ഥന നടത്തിയിരുന്നതായി പെണ്‍കുട്ടി മൊഴി നല്‍കി. കുമ്മിളില്‍ നിന്ന് പിടികൂടിയ അഫ്സലിനെതിരെ പോക്സോ വകുപ്പ് ചുമത്തിയാണ് പൊലീസ് അറസ്റ്റ് രേഖപ്പെടുത്തിയത്.