ചാടിപ്പോയ കുറുവസംഘാംഗത്തെ പിടികൂടി; പ്രതിയെ ആലപ്പുഴയിലെത്തിച്ചു

കൊച്ചിയില്‍ പൊലീസിനെ ആക്രമിച്ച് കുറുവാസംഘം മോചിപ്പിച്ച പ്രതി പിടിയില്‍. തമിഴ്നാട്ടുകാരന്‍ സന്തോഷ് സെല്‍വനെയാണ് കുണ്ടന്നൂരിലെ ചതുപ്പില്‍ നിന്ന് ആലപ്പുഴ– കൊച്ചി പൊലീസ് സംഘങ്ങള്‍ സംയുക്തമായി നടത്തിയ തിരച്ചിലില്‍  രാത്രി  പത്തുമണിയോടെ പിടികൂടിയത്. ആലപ്പുഴയിലെ മോഷണപരമ്പരക്കേസില്‍ മണ്ണഞ്ചേരി പൊലീസ് കസ്റ്റഡിയിലെടുത്ത പ്രതി കൈവിലങ്ങോടെയാണ് പൊലീസിനെ വെട്ടിച്ച് കടന്നത്. പ്രതി സന്തോഷ് സെല്‍വത്തെ ആലപ്പുഴ പൊലീസ് ട്രെയിനിങ് സെന്‍ററിലെത്തിച്ചു. ജില്ലാ പൊലീസ് മേധാവിയുടെ നേതൃത്വത്തിലാണ് ചോദ്യം ചെയ്യല്‍.

സ്ത്രീകളും കുട്ടികളുമടങ്ങുന്ന ഒരുസംഘം പൊലീസിനെ ആക്രമിച്ചാണ് സന്തോഷിനെ മോചിപ്പിച്ചത്. പ്രതി പിടിയിലായ വിവരം മനോരമ ന്യൂസിനോടാണ് ആലപ്പുഴ ഡിവൈ.എസ്.പി  എം.ആര്‍.മധു സ്ഥിരീകരിച്ചത്.  മോഷണസംഘത്തിലെ രണ്ടുപേരെയാണ് ഇന്ന് പൊലീസ് പിടികൂടിയത്. സ്ത്രീകളും കുട്ടികളും ഉള്‍പ്പെട്ട സംഘം പൊലീസിനെ ആക്രമിക്കുന്നതിനിടെ സന്തോഷ് ഒാടിരക്ഷപ്പെടുകയായിരുന്നു.