യുവതിയുടെ മരണം; ഭർത്താവ് അറസ്റ്റിൽ

ആലപ്പുഴ ആര്യാട് യുവതി ആത്മഹത്യ ചെയ്ത കേസിൽ ഭർത്താവ് അറസ്റ്റിൽ. ആര്യാട് സ്വദേശി സുമിത്തിനെയാണ് ആലപ്പുഴ നോർത്ത് പൊലീസ് അറസ്റ്റ് ചെയ്തത്.  ഒക്ടോബർ 7 നാണ്സുമിത്തിന്‍റെ ഭാര്യ സ്വാതിയെ ഭർതൃവീട്ടിൽ തൂങ്ങി മരിച്ച നിലയിൽ കണ്ടെത്തിയത്. വിഡിയോ റിപ്പോര്‍ട്ട് കാണാം. 

കുട്ടനാട്ടിലെ  മങ്കൊമ്പ് സ്വദേശിയാണ് സ്വാതി. കഴിഞ്ഞ ഒക്ടോബർ 7 നാണ് ഭർത്താവ് സുമിത്തിന്റെ ആര്യാട് ഐക്യഭാരതം വായനശാലയ്ക്ക് സമീപമുള്ള വീട്ടിൽ  സ്വാതിയെ തൂങ്ങിമരിച്ച നിലയിൽ കണ്ടെത്തിയത്. സ്വാതിയും ഭർത്താവും രണ്ട് കുട്ടികളും മാത്രമായിരുന്നു വീട്ടിൽ താമസം.  രാവിലെ 7 മണിയോടെ സുമിത്ത് തന്നെയാണ് കിടപ്പുമുറിയുടെ സമീപത്തുള്ള മുറിയിൽ സ്വാതിയെ തൂങ്ങി മരിച്ച നിലയിൽ കണ്ടെത്തിയത്. സുമിത്തിന്‍റെ മറ്റൊരു ബന്ധത്തിന്‍റെ പേരിൽ സ്വാതിയും സുമിത്തും തമ്മിൽ  വഴക്ക് പതിവായിരുന്നെന്ന്  സ്വാതിയുടെ ബന്ധുക്കൾ പറയുന്നു. 

 പല തവണ ബന്ധുക്കൾ ഇടപെട്ടെങ്കിലും സുമിത്ത് ബന്ധം അവസാനിപ്പിക്കാൻ തയാറായില്ല. ഇതോടെ സ്വാതി കടുത്ത നിരാശയിലായിരുന്നതായും വീട്ടുകാർ പറയുന്നു.  കെഎസ് ആർടിസി ആലപ്പുഴ ഡിപ്പോയിൽ എം പാനൽ ജീവനക്കാരനാണ് സുമിത്ത്. ഇയാൾക്കെതിരെ സ്വാതിയുടെ വീട്ടുകാർ നൽകിയ പരാതിയിൽ അന്വേഷണം നടത്തിയ പൊലീസ് ഇന്ന് ഉച്ചയ്ക്കാണ് ആലപ്പുഴ ഡിവൈഎസ്പി എംആര്‍ മധുബാബുവിന്‍റെ നേതൃത്വത്തില്‍ സുമിത്തിനെ അറസ്റ്റ് ചെയ്തത്.