കൊല്ലം കരുനാഗപ്പള്ളിയില്‍ നിന്നും കാണാതായ വിജയലക്ഷ്മിയുടെ മൃതദേഹം കണ്ടെത്തി. അമ്പലപ്പുഴ സ്വദേശിയായ സുഹൃത്ത് ജയചന്ദ്രന്‍റെ വീടിന് സമീപത്ത് നിന്നുമാണ് മൃതദേഹം കണ്ടെത്തിയത്. മൃതദേഹം പുറത്തെടുക്കാനുള്ള നടപടികള്‍ പുരോഗമിക്കുകയാണ്. വിജയലക്ഷ്മിയുടെ തിരോധാനത്തെ കുറിച്ച് പരാതി ലഭിച്ചതനുസരിച്ച് നടത്തിയ അന്വേഷണത്തില്‍ അമ്പലപ്പുഴ കരൂര്‍ സ്വദേശിയായ ജയചന്ദ്രനെ പൊലീസ് നേരത്തെ കസ്റ്റഡിയിലെടുത്തിരുന്നു. ഇയാളുടെ മൊഴി കേന്ദ്രീകരിച്ച് നടത്തിയ അന്വേഷണത്തിലാണ് വിജയലക്ഷ്മിയെ കൊലപ്പെടുത്തിയതായി സൂചനകള്‍ ലഭിച്ചത്. ജയചന്ദ്രന്‍റെ അറസ്റ്റ് രേഖപ്പെടുത്തി.
വിവാഹിതയായ വിജയലക്ഷ്മി ഭര്‍ത്താവില്‍ നിന്നകന്ന് കഴിയുകയായിരുന്നു. കൊച്ചിയിലെ കെഎസ്ആര്‍ടിസി ബസില്‍ നിന്ന് ലഭിച്ച മൊബൈല്‍ ഫോണാണ് നിര്‍ണായകമായത്. കണ്ടക്ടര്‍ പൊലീസില്‍ ഫോണ്‍ കൈമാറി. പൊലീസ് നടത്തിയ അന്വേഷണത്തിലാണ് ഇത് വിജയലക്ഷ്മിയുടേതെന്ന് സ്ഥിരീകരിച്ചത്. അമ്പലപ്പുഴയില്‍ വിജയലക്ഷ്മിയെത്തിയതിനും പൊലീസിന് തെളിവുകള്‍ ലഭിച്ചിരുന്നു.