യുവതിയെ കൊന്ന് ഫ്രിഡ്​ജില്‍ സൂക്ഷിച്ചു; കാര്യമറിയാതെ വാടകക്കാരന്‍ താമസിച്ചത് ആറ് മാസം

ലിവ് ഇന്‍ റിലേഷന്‍ഷിപ്പിലായിരുന്ന യുവതിയെ കൊലപ്പെടുത്തി ഫ്രിഡ്​ജില്‍ സൂക്ഷിച്ച് യുവാവ്. മൃതദേഹം ഫ്രിഡ്​ജിലിരിക്കുന്നത് അറിയാതെ പുതിയ വാടകക്കാരന്‍ വീട്ടില്‍ താമസിച്ചത് ആറ് മാസം. മധ്യപ്രദേശിലെ ദേവാസിലാണ് ഞെട്ടിപ്പിക്കുന്ന സംഭവം. മാസങ്ങള്‍ക്ക് മുമ്പ് കൊല്ലപ്പെട്ട പ്രതിഭയുടെ മൃതദേഹം പൊലീസ് വൃന്ദാവൻ ധാം കോളനിയിലെ ഫ്രിഡ്​ജില്‍ നിന്നും കണ്ടെത്തിയത്  കഴിഞ്ഞ ദിവസമാണ്. കേസിൽ സഞ്ജയ് പാട്ടിദാർ എന്ന യുവാവിനെ പോലീസ് അറസ്റ്റ് ചെയ്തു. 

പ്രതിഭയും സഞ്ജയും വർഷങ്ങളായി ലിവ്-ഇൻ റിലേഷനിലായിരുന്നു. ദുബായിലെ ധീരേന്ദ്ര ശ്രീവാസ്​തവയുടെ വീട്ടിലാണ് ഇരുവരും വാടകക്ക് താമസിച്ചിരുന്നത്. രണ്ടുനിലവീടിന്‍റെ താഴത്തെ നില രണ്ടായി തിരിച്ചതില്‍ ഒന്നിലായിരുന്നു ഇവരുടെ താമസം. ഇതിനിടെ വിവാഹത്തിനായി പ്രതിഭ സഞ്ജയ്​ക്ക് മേൽ സമ്മർദ്ദം ചെലുത്തി. എന്നാല്‍ നേരത്തെ തന്നെ വിവാഹിതനായിരുന്നു സഞ്ജയ്​ക്ക് പ്രതിഭയെ വിവാഹം ചെയ്യുന്നതില്‍ താല്‍പര്യമില്ലായിരുന്നു. 

വിവാഹം കഴിക്കാന്‍ പ്രതിഭ നിര്‍ബന്ധിച്ചതോടെയാണ് യുവതിയെ കഴുത്തുഞെരിച്ചു കൊലപ്പെടുത്തിയത്. സുഹൃത്തായ വിനോദ് ദവേയുടെ സഹായത്തോടെയാണ് പ്രതി കൊല ചെയ്​തത്. പിന്നാലെ ഇയാള്‍ വീട്ടില്‍ നിന്നും മാറി താമസിച്ചെങ്കിലും മൃതദേഹമിരിക്കുന്ന ഫ്രിഡ്​ജുള്‍പ്പെടെ മുറിയില്‍ സൂക്ഷിച്ചിരുന്നു.  പ്രതിഭയുടെ അച്ഛന് ഹൃദയാഘാതം സംഭവിച്ചുവെന്നും ചികില്‍സക്കായി നാട്ടിലേക്ക് പോയിരിക്കുകയാണെന്നുമാണ് സ‍ഞ്ജയ് ഉടമസ്ഥനോട് പറഞ്ഞിരുന്നത്. മ‍ൃതദേഹം പരിശോധിക്കാനായി 15 ദിവസം കൂടുമ്പോള്‍ ഇയാള്‍ വീട്ടിലേക്ക് വരുമായിരുന്നു.

ഇതിനിടെ വീട്ടില്‍ ബല്‍വീര്‍ എന്ന പുതിയ താമസക്കാരന്‍ വരുകയും ചെയ്​തു. സഞ്ജയ് പൂട്ടിയിട്ട മുറി ഇയാള്‍ക്ക് ഉപയോഗിക്കാനായിരുന്നില്ല. ഉടന്‍ ഒഴിഞ്ഞുപോകുമെന്നും സാധനങ്ങള്‍ മാറ്റുമെന്നും പറഞ്ഞിരുന്നെങ്കിലും അത് ഉണ്ടായില്ല. ഒരു ദിവസം സഞ്ജയ്​യുടെ മുറിയുടെ പൂട്ട് പൊളിച്ച് മുറി വൃത്തിയാക്കിയ ബല്‍വീര്‍ ഫ്രിഡ്​‍ജ് ഓണായിരിക്കുന്നത് കണ്ട് ഇത് ഓഫാക്കി തിരിച്ചിറങ്ങി. പിറ്റേന്ന് ഈ മുറിയില്‍ നിന്നും അസഹ്യമായ ദുര്‍ഗന്ധം ആണ് ഉണ്ടായത്. ഇതോടെ സംശയം തോന്നിയ ബല്‍വീര്‍ പൊലീസില്‍ വിവരം അറിയിക്കുകയായിരുന്നു. 

പൊലീസ് വന്ന് ഫ്രിഡ്​ജ് തുറന്നപ്പോള്‍ അഴുകിയ മ‍ൃതദേഹമാണ് പുറത്തേക്ക് വീണത്. ബെഡ്​ഷീറ്റില്‍ പൊതിഞ്ഞ നിലയിലായിരുന്നു മൃതദേഹം ഉണ്ടായിരുന്നത്. അയല്‍വാസികളെ ചോദ്യം ചെയ്​തപ്പോള്‍ ഒരു സ്ത്രീ സഞ്ജയ്​ക്കൊപ്പം താമസിച്ചിരുന്നുവെന്നും കുറച്ചു മാസങ്ങളായി അവരെ കാണാനില്ലായിരുന്നുവെന്നും മൊഴി നല്‍കി. തുടര്‍ന്നാണ് സഞ്ജയ്​യെ പൊലീസ് അറസ്റ്റ് ചെയ്​തത്. ‌വിശദമായ ചോദ്യം ചെയ്യലില്‍ ഇയാള്‍ കുറ്റം സമ്മതിച്ചു. കൂട്ടുപ്രതിയായ വിനോദ് മറ്റൊരു കേസില്‍ രാജസ്ഥാന്‍ ജയിലിലാണ്. രാജസ്ഥാന്‍ പൊലീസിനൊപ്പം സഹകരിച്ച് കേസന്വേഷണം പുരോഗമിക്കുമെന്ന് മധ്യപ്രദേശ് പൊലീസ് പറഞ്ഞു.