കസ്റ്റഡിയില്‍ നിന്ന് രക്ഷപ്പെട്ടത് മോഷ്ടിച്ച ബൈക്കില്‍; വടിവാൾ വിനീത് കേരളം വിട്ടിരിക്കാന്‍ സാധ്യത

പൊലീസിന്‍റെ കസ്റ്റഡിയിൽ നിന്ന് ചാടിയ വടിവാൾ വിനീത് തൃശൂർ വടക്കാഞ്ചേരിയിൽ നിന്ന് കടന്നത് മോഷ്ടിച്ച ബൈക്കിൽ. താക്കോൽ സഹിതം ടാങ്ക് നിറയെ പെട്രോളുമായി വീട്ടുമുറ്റത്തുണ്ടായിരുന്ന ബൈക്കാണ് വിനീത് തട്ടിയെടുത്തത്. 

 കേരളം കണ്ട അപകടകാരിയായ മോഷ്ടാവാണ് ആലപ്പുഴക്കാരൻ വടിവാൾ വിനീത് . ബൈക്ക് മോഷ്ടിച്ച കേസിൽ വടക്കാഞ്ചേരിയിലെ കോടതിയിൽ ഹാജരാക്കാൻ വിനീതിനെയും കൂട്ടാളി ശരത്തിനെയും പൊലീസ് എത്തിച്ചു. വടക്കാഞ്ചേരി റെയിൽവേ സ്റ്റേഷനിൽ ട്രെയിൻ ഇറങ്ങിയ ഉടനെ ഉദ്യോഗസ്ഥരെ തള്ളിയിട്ട് ഇരുവരും രക്ഷപ്പെട്ടു. രാഹുലിനെ വൈകിട്ട് തന്നെ അകമ്പാടത്തു നിന്ന് പിടികൂടി . അപ്പോഴും വിനീതിനെ പിടികൂടാനായില്ല. വിനീതിനെ പിടികൂടാനുള്ള തിരച്ചിൽ തുടരുന്നതിനിടെ ബൈക്ക് മോഷണത്തിന്‍റെ വാർത്ത വടക്കാഞ്ചേരി സ്റ്റേഷനിൽ എത്തി. ബൈക്ക് ഉടമ കുമ്പളങ്ങാട് സ്വദേശി ശരത്ത് പൊലീസിന് പരാതി നൽകി. വീട്ടുമുറ്റത്ത് നിർത്തിയിട്ട ബൈക്കിൽ താക്കോൽ വച്ചിരുന്നു . വണ്ടിയുടെ ടാങ്കിൽ 9 ലിറ്റർ പെട്രോളും. 200 കിലോമീറ്റർ യാത്ര ചെയ്യാനുള്ള ഇന്ധനം ബൈക്കിലുണ്ട്. വിനീത് ഈ ബൈക്കിൽ കേരളം വിട്ടിരിക്കാൻ ആണ് സാധ്യത.

വിനീതിനെയും രാഹുലിനെയും മാർച്ച് 3 ആലപ്പുഴ പോലീസ് പിടികൂടിയിരുന്നു. ആലപ്പുഴയിലെ ജയിലിൽ റിമാൻഡിൽ ആയിരുന്നു. വിനീതിനെ നേരത്തെ കൊല്ലത്ത് പിടികൂടിയതും ഏറെ സാഹസികമായാണ്. ബൈക്ക് മോഷണം ഉൾപ്പെടെ 60 കേസുകളിലെ പ്രതിയാണ് വിനീത്.