ആര്‍.ജെ ബാലാജി ചിത്രം സ്വര്‍ഗവാസലിന്‍റെ ട്രെയ്ലര്‍ പുറത്ത്; ശ്രദ്ധേയമായി മലയാളി സാന്നിധ്യം
- Entertainment
- Published on Nov 23, 2024, 08:34 PM IST
സിദ്ധാര്‍ഥ് വിശ്വനാഥ് ആദ്യമായ് സംവിധാനം ചെയ്ത ചിത്രം സ്വര്‍ഗവാസലിന്‍റെ ട്രെയ്ലര്‍ പുറത്ത്. ജയിലുകളിലെ അടിച്ചമര്‍ത്തലിന്‍റെയും അധികാരത്തിന്‍റെയും കഥ പറയുന്ന ചിത്രത്തില്‍ ആര്‍.ജെ ബാലാജിയാണ് പ്രധാന വേഷത്തിലെത്തുന്നത്. നവംബര്‍ 29 ന് തിയറ്ററുകളിലെത്തുന്ന ചിത്രത്തില്‍ ബാലാജിയെ കൂടാതെ സെല്‍വരാഘവന്‍, നടരാജന്‍ സുബ്രമണ്യം, കരുണാസ്, സാമുവല്‍ അബിയോള, റോബിന്‍സണ്‍ തുടങ്ങിയവരാണ് പ്രധാന വേഷങ്ങളിലെത്തുന്നത്.
ഇവരെ കൂടാതെ ഷറഫുദ്ദീന്‍, ഹക്കിം ഷാജഹാന്‍, സാനിയ ഇയ്യപ്പന്‍ തുടങ്ങിയ മലയാളി താരനിരയും ചിത്രത്തിലുണ്ട്.പൊലീസ് വേഷത്തിലാണ് ഷറഫുദ്ദീന്‍ ചിത്രത്തിലെത്തുന്നത്. ഹക്കിം ഷാജഹാന്‍ ജയില്‍ അന്തേവാസിയുടെ റോളാണ് കൈകാര്യം ചെയ്യുന്നത്. സാനിയ അയ്യപ്പനാണ് ചിത്രത്തിലെ നായിക. ആക്ഷന്‍ ത്രില്ലര്‍ വിഭാഗത്തില്‍ പെടുന്ന ചിത്രത്തില്‍ അടിമുടി വ്യത്യസ്തമായ റോളുകളിലാണ് മലയാളി അഭിനേതാക്കള്‍ എത്തുന്നത്.സുഡാനി ഫ്രം നൈജീരിയ എന്ന ചിത്രത്തില്‍ സുഡാനിയായി അഭിനയിച്ച സാമുവലും ചിത്രത്തിലുണ്ട്.സ്വൈപ് റൈറ്റ് സ്റ്റുഡിയോയും തിങ്ക് സ്റ്റുഡിയോയും സംയുക്തമായാണ് ചിത്രം നിര്‍മിക്കുന്നത്.
ഭ്രമയുഗം, സൂക്ഷ്മദര്‍ശിനി തുടങ്ങിയ സിനിമകളുടെ സംഗീത സംവിധായകന്‍ ക്രിസ്റ്റോ സേവ്യറാണ് സ്വര്‍ഗവാസലിന് സംഗീതമൊരുക്കിയിരിക്കുന്നത്. തമിഴ് പ്രഭ, അശ്വിന്‍ രവിചന്ദ്രന്‍, സിദ്ധാര്‍ഥ് വിശ്വനാഥ് എന്നിവരാണ് ചിത്രത്തിന്‍റ തിരക്കഥയൊരുക്കിയിരിക്കുന്നത്.
