‘അപ്പോ ആരംഭിച്ചത് ഇന്ത ഭയം’; സേതുപതിയും സൂരിയും നിറഞ്ഞ് ‘വിടുതലൈ 2’ ട്രെയിലര്‍

കോളിവുഡിനെ മുള്‍മുനയില്‍ നിര്‍ത്തിയ വിടുതലൈ സിനിമയുടെ രണ്ടാംഭാഗം ട്രെയിലര്‍ പുറത്ത്. സൂരിയെന്ന നടന്റെ അഭിയനമികവ് പ്രേക്ഷകരറിഞ്ഞ ചിത്രമായിരുന്നു വിടുതലൈ. തമിഴ് ‌സിനിമയിലെ എക്കാലത്തെയും മികച്ച സംവിധായകന്‍ വെട്രിമാരന്‍ ഒരുക്കുന്ന വിടുതലൈ 2 രണ്ടാം ഭാഗം ട്രയിലര്‍ സൈബറിടങ്ങളില്‍ തരംഗമാവുകയാണ്. 

ചെന്നൈയില്‍ നടന്ന പ്രൗഢഗംഭീരമായ ചടങ്ങിലായിരുന്നു രണ്ടാംഭാഗം ട്രെയിലര്‍ പുറത്തിറക്കിയത്. നിമിഷനേരം കൊണ്ടാണ് സോഷ്യല്‍ലോകത്തും ട്രെയിലര്‍ വൈറലായത്. ചിത്രത്തിലെ പ്രധാന താരങ്ങളായ വിജയ് സേതുപതി, സൂരി, പീറ്റര്‍ ഹെയിന്‍, വെട്രിമാരന്‍, സംഗീത സംവിധായകന്‍ ഇളയരാജ എന്നിവര്‍ ചടങ്ങില്‍ സന്നിഹിതരായിരുന്നു. ഡിസംബര്‍ 20ന് തിയറ്ററുകളിലെത്തുന്ന ചിത്രത്തില്‍ മഞ്ജുവാര്യരും പ്രാധാന്യമുള്ള വേഷത്തിലെത്തുന്നു. പുതുലുക്കിലാണ് മഞ്ജുവിനെ ചിത്രത്തില്‍ കാണാനാവുക. ഗൗതം വാസുദേവ് മേനോൻ , അനുരാഗ് കശ്യപ്, രാജീവ് മേനോൻ, ചേതൻ എന്നിവരാണ് ചിത്രത്തിലെ മറ്റു പ്രധാന വേഷങ്ങള്‍ കൈകാര്യം ചെയ്തിരിക്കുന്നത്. 

ഇളയരാജയാണ് സംഗീതസംവിധാനം നിര്‍വഹിച്ചിരിക്കുന്നത്. വിടുതലൈ ആദ്യഭാഗത്തിലും സൂരിക്കുവേണ്ടി  ഇളയരാജ പാടിയ പാട്ട് ഏറെ ശ്രദ്ധിക്കപ്പെട്ടിരുന്നു. 

ആർ എസ് ഇൻഫോടൈൻമെന്റിന്റെ ബാനറിൽ എൽറെഡ് കുമാറാണ് വിടുതലൈ രണ്ടാം ഭാഗത്തിന്റെ നിർമ്മാണം നിർവഹിക്കുന്നത്. ചിത്രത്തിന്റെ കേരളാ വിതരണാവകാശം വൈഗ എന്റർപ്രൈസസ് മെറിലാൻഡ് റിലീസസ് ആണ്.