മാന്യതയ്ക്കൊക്കെ ഒരു മര്യാദ വേണ്ടേ?; ചാക്കോച്ചന് പിഷാരടിയുടെ കുറിപ്പ്; വൈറല്‍

മലയാളസിനിമയുടെ എവര്‍ഗ്രീന്‍ ഹീറോ കുഞ്ചാക്കോ ബോബന് പിറന്നാള്‍ ആശംസകള്‍ നേര്‍ന്ന് നടന്‍ പിഷാരടി പങ്കുവച്ച കുറിപ്പ് സമൂഹമാധ്യമങ്ങളില്‍ ശ്രദ്ധനേടുകയാണ്. കുഞ്ചാക്കോ ബോബന്‍റെ 48ാം പിറന്നാള്‍ ദിനത്തിലാണ് വ്യത്യസ്മായ കുറിപ്പുമായി പിഷാരടി രംഗത്തെത്തിയത്. മാന്യതയ്‌ക്കൊക്കെ ഒരു മര്യാദ വേണ്ടേ? എന്ന രസകരമായ ചോദ്യമാണ് കുറിപ്പ് വൈറലാകാന്‍ കാരണമായത്. ഇരുവരും ഒരുമിച്ച് നില്‍ക്കുന്ന ചിത്രവും കുറിപ്പിനൊപ്പം പിഷാരടി പങ്കുവച്ചു. കുറിപ്പ് വൈറലായതോടെ പിറന്നാള്‍ ആശംസകള്‍ നേര്‍ന്നും രസകരമായ ട്രോളുകള്‍ പങ്കുവച്ചും ആരാധകരെത്തി.

പിഷാരടി പങ്കുവച്ച കുറിപ്പിന്‍റെ പൂര്‍ണരൂപം:

'കരിയർ കാൽ നൂറ്റാണ്ട് പിന്നിട്ടപ്പോഴും...എത്രയോ സൂപ്പർ ഹിറ്റുകളിൽ നായകനായപ്പോഴും, സിനിമാക്കാരൻ എന്ന തലക്കെട്ടിനു കീഴെ വരുന്ന ദുസ്വാതന്ത്ര്യങ്ങളൊന്നിലും കണ്ടിട്ടില്ലാത്ത കലാകാരൻ. മാന്യതയ്ക്കൊക്കെ ഒരു മര്യാദ വേണ്ടേ? ഇന്ന് ചാക്കോച്ചനു പിറന്നാൾ' എന്നാണ് പിഷാരടി കുറിച്ചത്.

മലയാള സിനിമയിലെ മാന്യതയുടെ മുഖം. പ്രിയ ചാക്കോച്ചന് പിറന്നാൾ ആശംസകൾ എന്ന് ഒരു ആരാധകന്‍ കമന്‍റ് ചെയ്തപ്പോള്‍ യാഥാർത്ഥ്യവും സിനിമയും കുടുംബവും ബന്ധങ്ങളും തിരിച്ചറിയുന്ന കലാകാരന്മാരിലൊരാളെന്നാണ് മറ്റൊരു ആരാധകന്‍ കുറിച്ചത്. ഒപ്പം ലോകസിനിമയിലെ അത്ഭുതങ്ങൾ മലയാളത്തിനു സംഭാവന ചെയ്ത കുടുംബത്തിലെ അംഗമെന്നും മലയാളികൾക്കെന്നും അഹങ്കാരമായ സുന്ദരനെന്നും കമന്‍റുകള്‍. 

അതേസമയം പിറന്നാള്‍ ദിനത്തില്‍ തന്‍റെ പുതിയ ചിത്രത്തിന്‍റെ വിശേഷങ്ങള്‍ കുഞ്ചാക്കോ ബോബനും പങ്കുവച്ചു. ഓഫീസർ ഓൺ ഡ്യൂട്ടി എന്നാണ് ചിത്രത്തിന്‍റെ പേര്. മാര്‍ട്ടിന്‍ പ്രക്കാട്ട് നിര്‍മിക്കുന്ന ചിത്രം സംവിധാനം ചെയ്യുന്നത് ജിത്തു അഷ്റഫാണ്. പൊലീസ് ക്രൈം ത്രില്ലർ ജോണറിലെത്തുന്ന ചിത്രത്തിന്‍റെ പോസ്റ്റര്‍ കുഞ്ചാക്കോ ബോബന്‍ പങ്കുവച്ചു.