ബേസില്‍ ജോസഫും നസ്രിയ നസിമും ആദ്യമായി ഒന്നിക്കുന്ന ചിത്രം സൂക്ഷ്മദര്‍ശിനിയുടെ ട്രെയിലര്‍ ഇറങ്ങി മണിക്കൂറുകള്‍ക്കകം കണ്ടത് ലക്ഷക്കണക്കിനാളുകള്‍. അയല്‌ക്കാരായി എത്തുന്ന ബേസിലിന്‍റേയും നസ്രിയയുടേയും ജീവിതത്തില്‍ പിന്നീട് സംഭവിക്കുന്ന അപ്രതീക്ഷിത സംഭവങ്ങളാണ് ചിത്രം പറയുന്നതെന്നാണ് ട്രെയിലര്‍ വ്യക്തമാക്കുന്നത്. പതിവ് ഗെറ്റപ്പില്‍ നിന്ന് മാറി ഒരു കുറ്റാന്വേഷകയുടെ റോളിലാണ് നസ്രിയയെത്തുന്നെന്നാണ് അണിയറപ്രവര്‍ത്തകര്‍ വ്യക്തമാക്കുന്നത്. നസ്രിയ ബേസില്‍ കൂട്ടുകെട്ട് കാണാന്‍ കാത്തിരിക്കുന്നുവെന്നാണ് കമന്‍റുകളേറെയും.
നവംബര്‍ 22നാണ് ചിത്രം തിയറ്ററുകളിലെത്തുന്നത്. എം.സി.ജിതിനാണ് ചിത്രത്തിന്‍റെ സംവിധാനം. ഒരു ഇടവേളയ്ക്ക് ശേഷമാണ് നസ്രിയ പുതിയ ചിത്രവുമായെത്തുന്നത് എന്ന പ്രത്യേകതയും സൂക്ഷ്മദര്‍ശിനിക്കുണ്ട്.ദീപക് പറമ്പോൾ, സിദ്ധാർത്ഥ് ഭരതൻ, കോട്ടയം രമേഷ്, അഖില ഭാർഗവൻ, പൂജ മോഹൻരാജ്, മെറിൻ ഫിലിപ്പ്, മനോഹരി ജോയ്, ഹിസാ മേഹക്, ഗോപൻ മങ്ങാട്ട്, ജയ കുറുപ്പ്, റിനി ഉദയകുമാർ, ജയിംസ്, നൗഷാദ് അലി, അപർണ റാം, സരസ്വതി റാം തുടങ്ങിയവരും ചിത്രത്തിലുണ്ട്.
അതുൽ രാമചന്ദ്രനും ലിബിൻ ടിബിയും ചേർന്നാണ് തിരക്കഥ. ക്രിസ്റ്റോ സേവ്യറിന്‍റേതാണ് സംഗീതം. ശരൺ വേലായുധൻ ഛായാഗ്രഹണവും ചമൻ ചാക്കോ എഡിറ്റിംഗും നിർവ്വഹിക്കുന്നു. ഹാപ്പി അവേഴ്‌സ് എൻ്റർടെയ്ൻമെൻ്റ്‌സിൻ്റെയും എവിഎ പ്രൊഡക്ഷൻസിൻ്റെയും ബാനറിൽ സമീർ താഹിർ, ഷൈജു ഖാലിദ്, എവി അനൂപ് എന്നിവർ ചേർന്നാണ് സൂക്ഷമദർശിനി നിർമ്മിക്കുന്നത്.