പ്രേക്ഷകര്‍ ആവേശത്തോടെ കാത്തിരിക്കുന്ന കമല്‍ ഹാസന്‍– മണിരത്നം ചിത്രം തഗ് ലൈഫിന്‍റെ ഫസ്റ്റ് ലുക്ക് പോസ്റ്റര്‍ പുറത്ത്. മുടി അഴിച്ച് അലസമായി ഇട്ടിരിക്കുന്ന കമല്‍ ഹാസനേയും ചിമ്പുവിനേയുമാണ് പോസ്റ്ററിലുള്ളത്. കമല്‍ ഹാസന്‍റെ 70ാമത് പിറന്നാള്‍ ദിനത്തിലാണ് പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന ചിത്രത്തിന്‍റെ ഫസ്റ്റ് ലുക്ക് വന്നിരിക്കുന്നത് എന്നതും ശ്രദ്ധേയമാണ്.
ഫസ്റ്റ് ലുക്ക് പോസ്റ്ററിനൊപ്പം ചിത്രത്തിന്‍റെ റിലീസ് ഡേറ്റ് പ്രഖ്യാപിച്ചുകൊണ്ടുള്ള ടീസറും പുറത്തുവിട്ടിട്ടുണ്ട്. ഒട്ടേറെ ആക്ഷന്‍ രംഗങ്ങള്‍ നിറഞ്ഞ ടീസറില്‍ കമല്‍ ഹാസന്‍റെ രണ്ട് ലുക്കും വ്യക്തമാക്കുന്നുണ്ട്. രംഗരായ ശക്തിവേല്‍ നായ്ക്കര്‍ എന്നാണ് ചിത്രത്തില്‍ കമല്‍ ഹാസന്‍ അവതരിപ്പിക്കുന്ന കഥാപാത്രത്തിന്‍റെ പേര്.
2025 ജൂണിലാവും ചിത്രം റിലീസ് ചെയ്യുക. 37 വര്‍ഷങ്ങള്‍ക്ക് ശേഷം മണിരത്നവും കമല്‍ ഹാസനും വീണ്ടും ഒന്നിക്കുന്ന എന്ന പ്രത്യേകതയും തഗ് ലൈഫിനുണ്ട്. 1987ല്‍ പുറത്തുവന്ന നായകനാണ് കമലും മണിരത്നവും ഒരുമിച്ച അവസാന ചിത്രം. എ.ആര്‍.റഹ്മാനാണ് ചിത്രത്തിന്‍റെ സംഗീത സംവിധാനം.
തൃഷ, അശോക് സെല്‍വന്‍, ഐശ്വര്യ ലക്ഷ്മി, ജോജു ജോര്‍ജ്, അഭിരാമി, നാസര്‍ എന്നിവരും ചിത്രത്തില്‍ പ്രധാനകഥാപാത്രങ്ങളെ അവതരിപ്പിക്കും. ചിത്രത്തിന്‍റെ പ്രഖ്യാപന സമയത്ത് ജയം രവിയും ദുല്‍ഖര്‍ സല്‍മാനും ചിത്രത്തിലുണ്ടായിരുന്നെങ്കിലും ഡേറ്റിന്‍റെ പ്രശ്നം മൂലം പിന്മാറുകയായിരുന്നു.
കമല്‍ ഹാസന്‍റെ രാജ്കമല്‍ ഫിലിംസിനൊപ്പം മണി രത്നത്തിന്‍റെ മദ്രാസ് ടാക്കീസും ഉദയനിധി സ്റ്റാലിന്‍റെ റെഡ് ജയന്‍റ് മൂവീസും ചേര്‍ന്നാണ് ചിത്രം നിര്‍മ്മിക്കുന്നത്.