യൂട്യൂബേഴ്​സിന്‍റെ സിനിമ, ഗ്യാങ്​സ്റ്ററായി ലോകേഷ്; പുതിയ ചിത്രം പ്രഖ്യാപിച്ചു

ഫൈറ്റ് ക്ലബിന് ശേഷം ലോകേഷ് കനകരാജിന്‍റെ ജി സ്​ക്വാഡിന്‍റെ ബാനറില്‍ പുതിയ ചിത്രം വരുന്നു. തമിഴ് യൂട്യൂബേഴ്​സായ ഭാരത്, നിരഞ്ജന്‍ എന്നിവരുടെ സിനിമാ അരങ്ങേറ്റം കുറിക്കുന്നതാണ് മിസ്റ്റര്‍ ഭാരത് എന്ന് പേരിട്ടിരിക്കുന്ന ചിത്രം. നിരഞ്ജന്‍‌ എഴുതി സംവിധാനം ചെയ്യുന്ന ചിത്രത്തില്‍ ഭാരതാണ് നായകനാവുന്നത്. അനൗണ്‍സ് ചെയ്​ത വിഡിയോയില്‍ ലോകേഷ് കനകരാജും  അഭിനയിച്ചിട്ടുണ്ട്. 

ഒരു ഗ്യാങ്​സ്റ്ററായാണ് വിഡിയോയില്‍ ലോകേഷ് കനകരാജ് എത്തുന്നത്. ഭീഷണിപ്പെടുത്താനായി കൊണ്ടുവന്ന യൂട്യൂബേഴ്​സിന്‍റെ സിനിമ അബദ്ധത്തില്‍ നിര്‍മിക്കാം എന്ന് ജി സ്​ക്വാഡിന്‍റെ തലവനായ ലോകേഷ് അബദ്ധത്തില്‍ സമ്മതിക്കുന്നു. തുടര്‍ന്ന് ജി സ്​ക്വാഡിന്‍റെ ബാനറില്‍ നിര്‍മിക്കുന്ന മിസ്റ്റര്‍ ഭാരതിന്‍റെ അനൗണ്‍സ്​മെന്‍റിലാണ് വിഡിയോ അവസാനിക്കുന്നത്. അനൗണ്‍സ്​മെന്‍റ് വിഡിയോക്ക് പുറമേ ചിത്രത്തിന്‍റെ ഫസ്​റ്റ് ലുക്കും പുറത്തുവന്നു. 

ലോകേഷിന് പുറമേ സുധൻ സുന്ദരം, ജഗദീഷ് പളനിസാമി എന്നിവരും ചേര്‍ന്നാണ് മിസ്റ്റര്‍ ഭാരത് നിര്‍മിക്കുന്നത്. സംയുക്ത വിശ്വനാഥൻ നായികയാവുന്ന ചിത്രത്തില്‍ ബാല ശരവണൻ, നിധി പ്രദീപ്, ആർ സുന്ദർ രാജൻ, ലിംഗ, ആദിത്യ കതിർ എന്നിവരും അഭിനയിക്കുന്നുണ്ട്.