സൂര്യ നായകനായി എത്തിയ സൂരരൈ പോട്രിന്റെ ഹിന്ദി റീമേക്കായ ‘സർഫിര’യുടെ ട്രെയ്ലര് എത്തി. സൂരരൈ പോട്ര് സംവിധാനം ചെയ്ത സുധ കൊങ്കാര തന്നെയാണ് സര്ഫിരയും സംവിധാനം ചെയ്തത്. അക്ഷയ് കുമാർ ആണ് ചിത്രത്തില് നായകവേഷത്തിലെത്തുന്നത്. അപർണ ബാലമുരളി അവതരിപ്പിച്ച ബൊമ്മിയെ അവതരിപ്പിക്കുന്നത് രാധിക മധൻ ആണ്. ട്രെയ്ലറില് അതിഥി വേഷത്തിലെത്തുന്ന സൂര്യയേയും കാണാം.
ചിത്രം ജൂലൈ 12ന് തിയറ്ററുകളിലെത്തും. പരേഷ് റാവൽ, ശരത്കുമാർ, സീമ ബിശ്വാസ്, സൗരഭ് ഗോയൽ എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. സൂര്യയുടെ നിർമാണക്കമ്പനിയായ 2 ഡി എന്റർടെയ്ൻമെന്റ്സും വിക്രം മൽഹോത്ര എന്റർടെയ്ൻമെന്റും ചേർന്നാണ് ചിത്രം നിർമിക്കുന്നത്.
ചുരുങ്ങിയ ചിലവിൽ സാധാരണക്കാർക്കു കൂടി യാത്രചെയ്യാൻ കഴിയുന്ന എയർ ഡെക്കാൻ സ്ഥാപകൻ ക്യാപ്റ്റൻ ഗോപിനാഥിന്റെ ജീവിതത്തെ ആസ്പദമാക്കി 2020ല് പുറത്തുവന്ന ചിത്രമായിരുന്നു സൂരരൈ പോട്ര്. മോഹൻ ബാബു, കരുണാസ് , പരേഷ് റാവൽ, ഉർവശി എന്നിവരായിരുന്നു സിനിമയില് മറ്റ് പ്രധാന കഥാപാത്രങ്ങളെ അവതരിപ്പിച്ചത്.