'വിജയ്​യുടെ സുഹൃത്തല്ലേ, അദ്ദേഹത്തിന്‍റെ പാര്‍ട്ടിയില്‍ ചേരുമോ?'; കീര്‍ത്തി സുരേഷിന്‍റെ മറുപടി

തമിഴ് സൂപ്പര്‍ താരം വിജയ് രാഷ്​ട്രീയ പാര്‍ട്ടി രൂപീകരിച്ചതോടെ താരരാഷ്​ട്രീയം തമിഴകത്ത് വീണ്ടും ചൂടുപിടിച്ചിരിക്കുകയാണ്. ആവശ്യത്തിനും അനാവശ്യത്തിനും താരങ്ങളോട് രാഷ്​ട്രീയ പ്രവേശനത്തെ പറ്റിയുള്ള ചോദ്യങ്ങളും ഉയരാറുണ്ട്. പുതുതായി കീര്‍ത്തി സുരേഷിലേക്കാണ് രാഷ്​ട്രീയ പ്രവേശനത്തെ പറ്റിയുള്ള ചോദ്യം വന്നിരിക്കുന്നത്. പുതിയ ചിത്രമായ രഘു താത്തയുടെ പ്രെസ് മീറ്റിലായിരുന്നു രാഷ്​ട്രീയ പ്രവേശനത്തെ പറ്റി ചോദ്യം ഉയര്‍ന്നത്. 

'വിജയ് രാഷ്​ട്രീയ പാര്‍ട്ടി രൂപീകരിച്ചു, നിങ്ങള്‍ സുഹൃത്തുക്കളാണല്ലോ, അദ്ദേഹത്തിന്‍റെ പാര്‍ട്ടിയിലേക്ക് ചേരുമോ?,' എന്ന ചോദ്യത്തിന് ഇല്ല, ഇപ്പോള്‍ അഭിനയത്തില്‍ മാത്രമാണ് ശ്രദ്ധ കേന്ദ്രീകരിക്കുന്നതെന്നാണ് കീര്‍ത്തി പറഞ്ഞത്. ഇപ്പോഴില്ല എന്ന് പറയുമ്പോള്‍ ഭാവിയില്‍ വരാന്‍ സാധ്യതയുണ്ടോ എന്ന് ചോദിച്ചപ്പോള്‍ 'ഭാവിയില്‍ വരുകയാണെങ്കില്‍ രാഷ്​ട്രീയത്തിലേക്കില്ല എന്നല്ലേ അന്ന് പറഞ്ഞത് എന്ന് നിങ്ങള്‍ ചോദിക്കില്ലേ, അതുകൊണ്ടാണ് ഇപ്പോള്‍ ഇല്ല എന്ന് പറഞ്ഞത്,' എന്നും കീര്‍ത്തി പറഞ്ഞു. 

രാഷ്​ട്രീയത്തിലേക്ക് ഇറങ്ങാന്‍ ആഗ്രഹമുണ്ട്, ഇപ്പോള്‍ ഇറങ്ങുന്നില്ല എന്നല്ലേ ഈ പറഞ്ഞതിന് അര്‍ത്ഥം എന്ന് വീണ്ടും മാധ്യമങ്ങള്‍ ചോദ്യം ആവര്‍ത്തിച്ചപ്പോള്‍, ഇറങ്ങാം, ഇറങ്ങാതെയുമിരിക്കാമെന്നും താരം പറഞ്ഞു.