അയൻ സിനിമയിലെ നൃത്ത രംഗവും സ്റ്റണ്ടും പുനരാവിഷ്കരിച്ച് വൈറലായ തിരുവനന്തപുരം രാജാജി നഗറിലെ താരങ്ങൾ ഒടുവിൽ നേരിട്ട് സൂര്യക്ക് മുന്നിലെത്തി. കങ്കുവ സിനിമയുടെ പ്രചാരണർത്ഥം നിശാഗന്ധി ഓഡിറ്റോറിയത്തിൽ നടന്ന പരിപാടിക്കിടെയാണ് 'രാജാജിയിലെ പിള്ളേര് ' നടന്‍ സൂര്യക്ക് മുന്നില്‍ പ്രകടനം കാഴ്ചവച്ചത്. കയ്യിലുണ്ടായിരുന്ന ആന്‍ഡ്രോയിഡ് ഫോണില്‍, സെല്‍ഫി സ്റ്റിക്കും വടിയും ഉപയോഗിച്ച് മൂന്ന് വര്‍ഷം മുന്‍പ് ഇവര്‍ ചിത്രീകരിച്ച വിഡിയോ ഏറെ തരംഗമായിരുന്നു.
നിശാഗന്ധിയിലെ തടിച്ചുകൂടിയ ആരാധക കൂട്ടത്തിന് ഇടയിലേക്കാണ് സൂര്യ വന്നിറങ്ങിയത്, എന്നാല്‍ നാല് വര്‍ഷം മുന്‍പ് വീഡിയോയിലൂടെ മാത്രം കണ്ട പിള്ളേര്, നേരിട്ട് കണ്ടുമുട്ടിയപ്പോള്‍ കീഴടക്കിയത് സൂര്യയുടെ മനസാണ്.
രാജാജി നഗറിലെ പിള്ളേര്‍ക്ക് സൂര്യ വെറുമാരു നടന്‍ മാത്രമല്ല, കൈ, മെയ്യ് മറന്നവര്‍ ചുവടുവച്ചതും, വെറുമൊരു ആരാധക കൂട്ടമായിട്ടുമല്ല. ഹൃദയം മുന്നില്‍ പറിച്ചു നല്‍കിയൊരു പ്രകടനമായിരുന്നു അത്. അയന്‍ സിനിമയിലെ പണം തട്ടുന്ന രംഗം ആക്ഷന്‍ സീക്വന്‍സുകളോടെ പകര്‍ത്തിയാണ് ചെങ്കല്‍ച്ചൂളയിലെ പിള്ളേര് മൂന്ന് വര്‍ഷം മുന്‍പ് നടന്‍ സൂര്യയെ ഞെട്ടിച്ചത്. വിഡിയോ പുറത്തിറങ്ങി മണിക്കൂറുകള്‍ക്കുള്ളില്‍ തന്നെ സമൂഹ മാധ്യമങ്ങളില്‍ വൈറലായ വിഡിയോ, സൂര്യ അന്ന് തന്‍റെ ട്വിറ്റര്‍ അക്കൗണ്ടില്‍ പങ്കുവെച്ചിരുന്നു. തുടര്‍ന്ന് സൂര്യക്ക് പിറന്നാള്‍ സമ്മാനമായി മറ്റൊരു വീഡിയോയും നിര്‍മിച്ചു. ഇപ്പോള്‍ വീണ്ടും നേരിട്ട് സൂര്യയ്ക്ക് മുന്നില്‍ ഡാന്‍സ് കളിക്കാന്‍ കഴിഞ്ഞതിന്‍റെ സന്തോഷം അവരുടെ കണ്ണുകളില്‍ പ്രകടമായിരുന്നു. ഡാന്‍സിന് ശേഷം സൂര്യ അവരെ ചേര്‍ത്ത്പിടിച്ചു. ആവേശകരമായ സ്വീകരണത്തിന് സ്നേഹ ചുമ്പനങ്ങള്‍ നല്‍കിയാണ് സൂര്യ മടങ്ങിയത്.