ഇന്ത്യന്‍ സിനിമ ലോകം കാത്തിരിക്കുന്ന ചിത്രമാണ് അല്ലു അര്‍ജുന്‍ നായകനാവുന്ന ചിത്രം പുഷ്പ 2. ആദ്യഭാഗം ഉണ്ടാക്കിയ ഓളം തന്നെയാണ് രണ്ടാം ഭാഗത്തിനായും ആകാംക്ഷ ഉണ്ടാക്കുന്നത്. അല്ലു അര്‍ജുന്‍റെ വേറിട്ട ലുക്കും ഇതുവരെ കാണാത്ത പ്രകടനത്തിനുമൊപ്പം ഫഹദ് ഫാസിലിന്‍റെ വില്ലന്‍ വേഷവും ശ്രദ്ധ നേടി. ചിത്രത്തിലെ സാമന്തയുടെ ഡാന്‍സ് നമ്പരും തിയേറ്ററില്‍ ആരാധകരെ ഇളക്കി മറിച്ചിരുന്നു.
ചിത്രത്തിന്‍റെ രണ്ടാം ഭാഗം വരുന്നുവെന്ന് അറി‍ഞ്ഞപ്പോള്‍ ഇത്തവണ ഡാന്‍സ് നമ്പരില്‍ ആരാവും അല്ലുവിനൊപ്പം എത്തുക എന്ന ചര്‍ച്ചകള്‍ ആരംഭിച്ചിരുന്നു. ബോളിവുഡ് താരം ശ്രദ്ധ കപൂറിന്‍റെ പേര് വരെ പുഷ്പ 2വിന്‍റെ ഡാന്‍സ് നമ്പരിലേക്ക് പറഞ്ഞുകേട്ടിരുന്നു. ഊഹാപോഹങ്ങള്‍ക്ക് വിരാമമിട്ടുകൊണ്ട് ശ്രീലീല ആവും ചിത്രത്തിലെത്തുക എന്ന വിവരം പുറത്തുവന്നിരുന്നു.
ഇപ്പോഴിതാ ശ്രീലീലയുടേയും അല്ലുവിന്‍റെ ഒരു സ്റ്റില്‍ സോഷ്യല്‍ മീഡിയയില്‍ വൈറലാവുകയാണ്. ഡാന്‍സ് നമ്പരിനിടയിലുള്ള സ്റ്റില്ലാണ് ഇതെന്ന് വ്യക്തം. തെലുങ്കില്‍ ഡാന്‍സ് കൊണ്ട് ഏറെ ശ്രദ്ധ നേടിയ താരമാണ് ശ്രീലീല. മഹേഷ് ബാബുവിനൊപ്പമുള്ള കുര്‍ച്ചി മര്‍ത്തപ്പെട്ടി എന്ന ഗാനം തരംഗമായിരുന്നു. തന്‍റെ ഡാന്‍സ് കൊണ്ട് മറ്റ് താരങ്ങള്‍ക്ക് വെല്ലുവിളി ഉയര്‍ത്തുന്ന ശ്രീലീല ഇത്തവണ അല്ലുവിനെ മറികടക്കുമോ എന്നാണ് കണ്ടറിയേണ്ടത്. സുകുമാര്‍ സംവിധാനം ചെയ്യുന്ന ചിത്രത്തില്‍ രശ്മിക മന്ദാനയാണ് നായിക. ഡിസംബര്‍ അഞ്ചിനാണ് പുഷ്പ 2 റിലീസ് ചെയ്യുന്നത്.